17-25 сентябрьыште Санкт-Петербургышто Российысе «Студенческий лидер» ХХ конкурсын финалже эртаралтын.
Тушто элнан кандаш округшо гыч 16 финалист лийын. Ты радамыште Юл кундемын чапшым кумытын араленыт.
Финалист-влак кажне кечын конкурслаште шке мастарлыкыштым тергеныт: шкешт нерген презентацийым ончыктеныт, профсоюз организацийыштым пашаштым каласкаленыт, правовой ориентирований дене тестым эртеныт, вуйлатыме паша шотышто икте-весышт дене таҥасеныт, тӱрлӧ йодышлан вашештеныт.
«Студенческий лидер» конкурсышто икымше верым да 250 тӱжем теҥгем Рӱдӧ федеральный округ гыч П.Москвитина сеҥен налын. Кокымшо верыш лекше А.Умновалан (Юл кундем федеральный округ, Пермь) 150 тӱжем теҥгем кучыктеныт. Кумшо вер да 100 тӱжем теҥге Йӱдвел-касвел федеральный округ гыч Ю.Петиналан логалын.
Марий Эл гыч ты мероприятийыш визытын миен коштыныт. МарГУ-н студентше-влак Евгений Степанов ден Ульяна Ямбарцева, ПГТУ-со профсоюз ушемын активистше-влак Виктория Терехова, Анна Киселева, Анастасия Козлова ПФО-со лидер-влаклан полышкаленыт.
Снимкыште: У.Ямбарцева, В.Терехова, А.Киселева, Е.Степанов.
Фото-влакым Ульяна Ямбарцеван ВКонтакте соцкылысе лаштыкше гыч налме.