Волгатехын студенткыже Дарья Румянцева «Лидеры изменений» программын финалышкыже лектын.
Шкем лидер семын кушкаш туныктымо курсыш Юл кундемын тӱрлӧ регионжо гыч 42 активист ушнен.
Ты курс лидерым палемдаш, ончыкыжым самырык-влак шотышто кугыжаныш политике аланыште пашам ышташ участникым ойырен налаш шонымаш дене эртаралтеш.
Тӱҥалтыш кок этап Самара да Нижний Новгород олалаште лийын. Тушто Волгатех гыч Д.Румянцева ден А.Романова участвоватленыт. Озаҥыште эртаралтше финальный этапыш 20 еҥ лектын, нунын коклаште – Дарья Румянцева.
– Мыланна самырык-влак дене пашам ышташ, нунын дене кылым муын моштымашым ончыкташ кӱлын. Ятыр еҥ дене палыме лийынам, вес регионышто шуктымо паша нерген пален налынам, – манеш Дарья.