«Тыланда омса эре почмо», – маныт Морко районысо Кокласола школышто ыштыше педагог-влак. Тиде поро шомакше лицейым пытарыше-шамычлан пӧлеклалтын. А нуныжо тыгак порын вашештат – лицейышке толаш огыт мондо.
Теве шукерте огыл кум ӱдыр лицейышке толын кайыш. Шке жапыштыже Настя ден Сэда биолого-химический направлениян классым тунем пытарышт. Ынде врач лияш ямдылалтыт. А Юлия Анисимова Москваште тунемеш. Тудо Калык-влакын келшымашышт Российысе университетыште (РУДН) шинчымашым пога. Ончыкылык профессийже химий дене кылдалтын.
Юлия, Настя, Сэда 11-ше классыште тунемше-влак дене вашлиймашым эртареныт. Чон почын мутланымаште школ илышын тӱрлӧ йыжыҥже, ЕГЭ-лан ямдылалтме, профессийым ойырен налме нерген ойленыт.
Тыгай вашлиймашын пайдаже моткоч кугу.
Фотошто – Юлия Анисимова тунемше-влак дене вашлиймаш годым.
Вячеслав Смирнов.
Морко район.
Фотом школын архивше гыч налме.