«Летопись сердец» патриотический акций тӱҥалеш
25 апрель гыч 20 май марте «Культура для школьников» культурно-образовательный проектын «Летопись сердец» российысе патриотический акцийже эрта. Тений тудо Ачамландым аралышын идалыкшылан да Кугу Ачамланде сарыште Сеҥымашлан 80 ий теммылан пӧлеклалтеш.
Акций школьник-влак коклаште элым йӧратымашым, чын гражданин семын кушмашым да патриотизм шӱлышым шыҥдараш виктаралтын. Тудо Кугу Ачамланде сарын ветеранже, спецоперацийын участникше-влак, тыгак Афганистаныште, Чечняште да Сирийыште локальный конфликт-шамычын примерышт дене элнан геройло ожнысо илышыжым ончыкта.
Акцийым иктешлымеке, эксперт комиссий 100 эн оҥай пашам ойырен налеш. Нуно 2025 ий 20 июньышто «Культурадляшкольников.РФ» порталыште савыкталтыт.