Ленинград блокадым шарнен

27 январьыште, Ленинград олам немыч фашист блокаде гыч утарыме кечын, Йошкар-Олаште шарнымаш мероприятий-влак эртаралтыныт.

Марий Эл гыч 4,5 тӱжем наре еҥ ты олам аралыме годым колен. Ленинград гыч республикыш Кугыжаныш оптический институтым, Ленинградысе Военно-воздушный академийым, Ленинградысе Оптико-механический заводым эвакуироватленыт, тыгак – ятыр тулык йочам.

872 кече шуйнышо Ленинград блокаде событий-влакым шарныме лӱмеш Марий Элым Вуйлатыше Ю.Зайцев, кугыжаныш кучем орган-влакын еҥышт Воинский чап монумент да Курымашлык тул дек пеледышым пыштеныт.

Ты кечылан пӧлеклалтше моло мероприятий-влак республикыште ятыр эртаралтыныт. С.Чавайн лӱмеш Национальный книгагудышто «Выстоял. Сражался. Победил!» программым ямдыленыт. Тыгаяк лӱман ончерыш Ленинградыште илыше-влакын подвигышт дене палдарыше фото-влакым, военный операций схемылам, дневник ден серышла гыч ужашым, шарнымаш-влакым чумыреныт. Книгагудышто тыгак «Помним, гордимся!» книга выставке лийын, толшо-влаклан Ленинградысе тӱвыра илыш нерген фильмым ончыктеныт.

Рӱдолаштак «Блокадный хлеб» акций эртаралтын. Волонтёр-шамыч, «Волжский путь» исторический реконструкций клубын еҥже-влак, Йошкар-Оласе 11-ше №-ан лицейын тунемшыже-шамыч Сеҥымаш да Чавайн бульварлаште блокаде нерген палдарыше листовкым да 125 г кинде шултышым пуэденыт.

Д.Речкинын фотожо.