Морко районысо Кораксола ялыште Шорыкйол пайрем республик кӱкшытыштӧ эртаралте.
Пайрем пеш веселан эртен. Кораксола ял мучко гармонь сем йоҥген, тӱмыр йӱк мӱгыралтын, мӧчӧр-влак мурен-мурен эртеныт да чыланат София Николаевна ден Александр Викторович Кирилловмытын суртышкышт вашкеныт. Пайрем мӧчӧр-влакым София Николаевна пеш порын вашлийын. Шке кид пашаж дене ончерым сӧрастарен. Александр Викторовичын мозаикыже кажнын кумылым савырен.
А мӧчӧржӧ-влак кушеч гына толын огытыл! Озаҥ, Йошкар-Ола, Шордӱр, Унчо, Кугу Шале, Ердӱр, Кораксола ял да моло вер гыч.
Шорыкйол пайремыш чумыргышо калыклан моткоч шуко мужедмаш эртаралтын. Кажныже ты идалыкыште тудым мо вучымым, кузе илен эртарышашым пален налаш тыршен. Марлан кайыдыме ӱдыр але ӱдыр налдыме рвезе ведрам упшалын да кудывече гыч лектын, мужыран лияш шонышыжо печым ӧндалын, а южыжо идалык мучко могай илыш вучымым палаш чыве ден агытанлан пырчым, шӱчым да вӱдым темлен.
Пайремын кокымшо ужашыже Кораксола тӱвыра пӧртыштӧ эртен. Пайрем концертым почаш мут шерге уна-влаклан: Марий тӱвыра рӱдер гыч толшо В.Г.Петровлан, С.В.Карповлан, Морко кундемын чолга ӱдыржӧ Н.В.Пушкиналан – пуалтын. Республикнан тӱрлӧ кундемлаж гыч толшо усталык коллектив-влак куандареныт.
Кораксола кундемыштына республик кӱкшытан Шорыкйол пайрем моткоч чот сайын эртен. Тышке Морко районысо тӱвыра полатын пашаеҥышт, Морко районысо администраций пеш кугу надырым пыштеныт. Поснак кугу таум каласыме шуэш Йошкар-Ола гыч толшо чыла уна-влаклан, телевиденийлан («Пошкудем» передачым вӱдышӧ Людмила Фёдоровалан), Шӱргыял школ вуйлатыше В.И.Кирилловлан да школ столовыйышто чыла участник-влакым тамле кочкыш дене сийлыше М.В.Коряковалан, Н.И.Силантьевалан да С.И.Эмановалан. Тыгак чон гыч лекше кугу тау В.А.Дмитриевлан, Д.В.Павловалан, В.В.Ивановлан, А.Г.Васильевлан, В.А.Борисовлан да моло-влакланат. Чыла усталык коллективлан таум ойлена, кӧ ты кечын пайрем концертым сӧрастарен. А тыгак кугу таум каласена Кораксола тӱвыра пӧрт пеленысе «Муро кумыл» фольклор ансамбльын участникше-влаклан, тӱвыра пӧртнан чыла пашаеҥыштлан, Кораксола ял калыклан да пошкудо ялла гыч Шорыкйол пайремнам ончаш толшо уна-влаклан. Тау лийже чылалан! Таза лийза!
Елена Григорьева, Кораксола тӱвыра пӧрт вуйлатыше.
