10-18 майыште Марий кугыжаныш университетыште латынь йылме дене конкурс лийын. Тушто тӱрлӧ элла гыч толшо 250 утла студент таҥасен. Нуно медицине да йот йылме-влак факультетлаште тунемыт.
Латынь йылмым да античный культурым йӧратыше-влак латынь грамматике, усталык да «Гаудеамус» муро конкурслаште мастарлыкыштым тергеныт. Усталык номинаций кок ужаш гыч шоген. Икымше ужаш Менделеевын периодике таблицыжлан 150 ий теммылан пӧлеклалтын. Тушто медицине факультетын студентше-влак таҥасеныт. Вес ужашыже гуманитарный направлений дене эртен, тудо Российысе Театр идалыклан пӧлеклалтын.
24 майыште конкурс-влакым иктешлыме. «Студент-влак келге шинчымашым да мастарлыкым ончыктеныт», – палемденыт жюрин еҥже-влак. Сеҥыше-влаклан грамотым да пӧлекым кучыктеныт. Пытартышлан тӱнямбалсе «Гаудеамус» гимным муреныт. Олимпиаде студент-влакын ушешышт сай шарнымашым коден.
И.Г.Иванова, Ф.Я.Хабибуллина, МарГУ-н доцентше-влак.