Оршанке район Кугу Ӧрша ялыште Рыбаковмыт ешыште 12 йоча кушкеш. Тышеч ныл йочаже шкеныштын, а кандашыже приёмный улыт.
Ончаш налме йоча-влак кок еш гыч улыт: ик еш гыч куд икшыве да весе гыч коктын. Сандене кум ешым ушен шогат.
2021 ийыште Елена Леонидовна ден Алекасндр Иванович Рыбаковмыт Юл кундемыште эртаралтше «Успешная семья» конкурсышто Марий Элын чапшым араленыт. Тунам ешыштышт индеш йоча кушкын. Сандене тений «Уло еш дене» акцийыш шоналтыде ушненыт.
«Тынар шуко йоча дене неле огыл?» – йодым ава деч.
– Уке, икшыве-шамыч дене йӧсӧ огыл. Лач урокым тунеммаште нелылык лектеш. Тӱрлӧ предмет дене заданий-влакым шукташ моткоч шуко жапым ойырена. Шукынжо спорт дене кылым кучат. Ӱдыр-шамыч «Лӱдыкшыдымылык школышто» туризм дене заниматлат.
Такшым Александр Иванович образованийже дене – физкультурым туныктышо. Оршанке педколледжым тунем пытарен. Ятыр жап каменщиклан пашам ыштен. Кызыт илыме кок пачашан кӱ пӧртшымат шкеак ыштен. Ача начар тазалыкшылан кӧра пашам ок ыште.
Елена Леонидовна Оршанкысе кинде заводышто коло ий пашам ыштен. Пытартыш вич ийже мастерлан тыршен. Ава кызыт нуным ончымо дене опекун семын документым оформитлен.
Рыбаковмыт кугу озанлыкым кучат. Ялысе моло еш семын чывым, комбым да казам веле огыл, тыгак страусым, павлиным, фазаным ашнат.