Латкок ияш куралаш тӱҥалын

Вера Михайловна Денисова 1932 ийыште Весшӱргӧ ялыште шочын. Кум ияшыж годым ешыже Масканур ялыш илаш кусна. Весшӱргӧ ялыште куд классым тунем пытарымеке, тудо тунеммым чарна. «Мемнан ялыште ик тунемше ӱдырат лийын огыл, мыят чарненам. Авай эре кӱнчылам шӱдырыктынеже, тунемаш огеш покто. Тудо  тунемдыме лийын, лач шке лӱмжым подписатлен мошта ыле», – каласкала Вера Михайловна.

«Кугу Отечественный сар тӱҥалме ийын икымше классыш коштынам. Шарнем сар тӱҥалме кечым. Тунам Изи Маршаныште ял калык пеш кугу пайремым ыштен. Иктаж 10 шагатлан имне дене кудал толыныт да сар тӱҥалме нерген увертареныт.  Еҥ-влак шортыт, а ме, йоча-влак, тунам нимом умылен огынал. Эрлашыжым куд шагат эрдене мемнан ялысе рвезе-влакым наҥгаяш тӱҥальыч. Кажне кечын гаяк эре армийыш ужатеныт. Ялыште йоча-влак веле кодынна. Акамым Звенигово могырыш окопым кӱнчаш наҥгаеныт. Тушто тудо землянкыште илен. Варажым тушеч пеле колышо, шужен, кылмен пужлышо шылын толын. Акам тӧрланен шуктыш, да тудым тюрьмаш кучен наҥгайышт. Ик тылзе Моркышто илыш. А вара марлан каяш темлышт, марийжат лектын. Акам ончале да лучо тюрьмаш каем манын, мӧҥгеш пурыш. Тыге тудо ныл ий тюрьмаште эртарен.

Ачам кум сарыште лийын. Икымшыже –  империалистический. Вара граждан сарыште участвоватлен. 1942 ийыште шошым Кугу Отечественный сарыш наҥгаеныт. Пленышкат логалын», – умбакыже ойла В.Денисова.

Сар годым йоча-влаклан ятыр паша логалын. Вера Михайловна 12 ияшак куралаш тӱҥалын. Тудо жапыште сайрак имньым сарыш колтеныт, начарракше колхозеш кодын.

Марлан самырык ӱдыр Изи Маршан ял качылан каен. Куд ий Изи Маршаныште илымеке, самырык еш Масканурыш илаш куснен. Вера ден Яков Денисовмыт куд шочшым ончен куштеныт да йол ӱмбак шогалтеныт. Нунын кокла гыч иктыже – палыме мурызо Татьяна Денисова. Кызыт Вера Михайловна Иван эргыже дене Масканурышто ила.