Латик школ команде таҥасен

Российысе кум субъект гыч латик команде интеллектуальный модышышто вашлийын.

21 февральыште Нижегородский областьысе, Удмуртий ден Марий Элысе школлаште 9-ше классыште тунемше-влак коклаште «Великолепная пятёрка» IV онлайн-модыш лийын.

Волгатехын порталыштыже йоча-влак вич направлений (математике, физике, биологий, химий, руш йылме) дене кок минут жапыште йодыш-влаклан вашмутым пуэныт.

Ончыл верыш Звенигово оласе лицейын «Импульс» командыже лектын. Кокымшо верыште Марий Элысе шуко профилян лицей-интернатын «Авангард» да Нижегородский областьысе  Прудовский школын «Эрудиты» командышт лийыныт. Медведево посёлкысо 2-шо номеран школын «Факел» командыже – кумшо.