Лап аркаште калык лыҥ погынен. Выче-выче мутланат, коклан-коклан йӱкын воштылал колтат. Вате-влак марий тувырым чиеныт, кажныжын тувыржо мотор, кеҥеж жап семын тӱрлӧ тӱсан. Олымбалне гармоньым да кок вынер котомкам вераҥдыме. Теве гармонист весела семым шокталтышат, калык рӱжге кушташ лекте. Ӱдыр-влак мурым мурышт, а школышко коштшо йоча-влак руш сем почеш куштышт. Варажым «Шырпак пуэдымыла» модынна, «Почтальон деч увер» сценкыште мастарлыкнам ончыктенна. «Могай амал тыйым тышке конден?» – йодышлан кажнын вашмутшо оҥай да ойыртемалтше лийын. Пошкудо йолташ-влакын каласкалымыштым чон вургыж колыштынна. Шочмо Провой кундем Кӱшыл Памъялна – кугезе мландынам йӧратыме, коча-кованан йӱлам перегыме, икте-весым аклыме, келшен илыме вер. Тек ончыкшымат гармонь йӱк Памъял калыкым куандарен шога. Кӧ толаш ярсен огыл гын, мемнан семынак весела кумылын тавен-чӱчкен пашам ыштен, очыни. Йӧратыме калыкемлан тыге ойлем: чий марий тувыретым, пид йорвыла шовычетым, тек пайрем кечын толеш тый декет пошкудет.
Людмила ЭЛЬДЕЕВА.
Провой кундем.