6 октябрьыште сылнымутлан негызым пыштыше Сергей Чавайнын (1888-1937) шочмыжлан — 135 ий темын. Тидын лӱмеш республикыштына шуко мероприятий эртаралтеш. 5 октябрьыште Йылмым, литературым да историйым научнын шым кундемыштынлыше В.М.Васильев институтышто «Сергей Чавайн. Айдеме. Сылнымут паша. Курым» теме дене Россий кӱкшытан научно-практический конференций лийын. кундемыштына тыгай мероприятий вич ийлан ик гана эртаралтеш.
Конференцийым писательын 120 ияш лӱмгечыжлан ямдылыме «Илыш да пӱрымаш» фильмым ончыктымо дене почыныт. Тушко Марий Эл, Татарстан, Удмурт, Коми, Мордовий республикла гыч учёный, тӱвыра да образований пашаеҥ, журналист да студент-влак погыненыт. Нуно писательын пашаже-влакым, кызытсе национальный литературын могай кӱкшытыштӧ улмыжым лончыленыт.
Тыге, мутлан, С.Чавайнын творчествыжым кызытсе илышлан келыштаралтше кумдыкышто кузе кучылтмо нерген мутланеныт. Тудын тӱрлӧ йылмылашке произведений-влакым кузе кусарымыжым лончыленыт. Писательын произведенийже-влакым школлаште туныктымо да тӱвыра аланыште палдарыме йодышлан кугу тӱткышым ойыреныт. Тыгак С.Чавайнын марий литературышто кучылтмо шкешотан йӱлажым шымленыт. Национальный йылмыла дене возышо автор-влакын тӱняумылымашыштым произведенийышт гоч лончыленыт. Нунын творчествыштым аралаш да еҥ-влак коклаште шаркалаш верысе книгагудын, архивын, тоштерын кузе полшен кертмышт нерген каҥашеныт. Кызыт тошто курымысо еҥ-влакын пашаштым, йӱлаштым, культурыштым арален кодымаш ик эн тӱҥ задачылан шотлалтеш. Тидымак каҥашеныт да лончыленыт эртыше конферецийыште.
Тылеч посна конференций кышкарыште «Творчество М.Шкетана: история и современность» темым тарватыме да тудым «йыргешке ӱстел» годым каҥашыме. Тудо М.Шкетанын 125 ияш лӱмгечыжлан пӧлеклалтын. Тушто классикын марий литературым да тӱвырам вияҥдаш полшымаште могай кышам кодымыжо, кызытсе марий культурышто М.Шкетанын йӱлажым кучылтмо, да тудын ыштен кодымо сомылжым аралыме нерген мутланеныт.