Лӱмжым шарнен илаш манын…

 

21 майыште Волжский район Карай кыдалаш школышто журналист, Марий АССР да Россий тӱвыран сулло пашаеҥже, МАССР Верховный Совет президиум председательын алмаштышыже (1988-1990) Василий Александрович Матюшевлан шарнымаш оҥам почмо. Тудым Тӱвыра, печать да калык-влакын пашашт шотышто министерствын полышыж дене Марий калык конгресс ямдылен.

Шарнымаш пайремыште уста журналист нерген поро шомакым Волжский районысо депутат-влак погынымашым вуйлатыше В.И.Сергеев, Оньыжа Э.В.Александров, Марий национальный конгрессын председательже, «Кугарня» ГУКП директор Э.А.Иманаев, «Марий Эл» газетын тӱҥ редакторжо А.С.Абдулов ойленыт.

В.А.Матюшев нерген ик классыште тунемме да парт коклаште йыгыре шинчыше Раиса Ивановна Колесникова оҥайын каласкалыш.

Тыгаяк шарнымашым колышташ Олыкъялыште илыше Валерий Андреевич Андреев деке мийышна. Тудлан Василий йолташыже Озаҥыш тунемаш каяш ойым пуэн, тыге тудо географийым туныктышо лийын, а тыгай пашаеҥже тунамат да кызытат районышто моткочак шагалын улыт.

Пошкудо ялеш шочшо ушан-шотан еҥ, журналист пашаште надырым пыштыше землякышт нерген мероприятийым вӱдышӧ-влак Д.Ватютова ден К.Захарова, школ директор Л.А.Сергеева каласкалышт.

Василий Александровичым порын шарналтыме мероприятий Карай школышто кодшо ийын шочмыжлан 80 ий темме лӱмеш  эртаралтын ыле. Тидак Марий национальный конгрессын да Карай школым мемориал оҥам ямдылаш таратен.

Ты оҥам школ пырдыжеш вераҥдыме да ош солык дене петырыме ыле. Тудым почаш сайын тунемше да чолга йоча-влаклан темленыт. Тыгай суапан сомылым 8-ше классыште тунемше Денис Янцитов ден 10-шо клаcсыште тунемше Даша Захарова шуктышт.

Эльвира ТЕРЕНТЬЕВА.

Авторын фотожо-влак.