28 сентябрьыште М.Шкетан лӱмеш Марий кугыжаныш драмтеатр шке тургымжым «Элнет» спектакль дене почо. 6 октябрьыште, С.Г.Чавайнын шочмыжлан 135 ий темме кечын, тыште литератур классикнан вес произведенийже, «Мӱкш отар» пьесыж, почеш пашам ончыктат.
А 14 октябрьыште эше ик у премьерым – режиссёр А.Ямаевын В.Красногоровын пьесыж почеш шындыме «Уш йоммеш йӧратымаш» спектакльым – ужына. Ты шотышто Алексей Анатольевич дене мутланышна.
– Алексей Анатольевич, молан тиде пьесым ойырен налында да кунам туддене пашам ышташ тӱҥалында?
– Кажне режиссёрын папкыштыже иктаж-могай да пьесе уло. Идалык тӱҥалтыште ме Валентин Красногоровын «Любовь до потери памяти» пьесыжым каҥашаш тӱҥалынна. Мыланем лач ты паша моткоч оҥайын чучын. Жанр почеш тиде экцентрический комедий. Такшым комедийым, тыгак йоча спектакльым шындаш пеш неле.
Кеҥежым репетицийым тӱҥална. Кызыт ынде иктешлымашан сомыл-влакым шуктена да вашке премьерым ончыктена.
– Пьесын лӱмжак йӧраташ таратыше, интригым шочыктышо. Спектакльыштат тугаяк оҥай интриге-влак палдырнат мо?
– Уло спектакльже интриге дене авалтын. Сюжетше тыгайрак: доктыр деке пациент толеш да вуйушым йомдаренам манеш. А вара историй тыге савырна: доктыржат вуйушым йомдараш тӱҥалешла чучеш. Тыге детективный историй шочеш. Тыгай шонымашым, эмоцийым зритель мучаш марте кучыжо манын тыршенна. Артист-влак кузе тидым модын ончыктат, ончалына.
– Мыняр актёр спектакльыште модеш?
– Тыште вич актёр сценышке лектеш. Тылеч посна дублёр-влак улыт. Сандене кок составыште лу утла актёр тырша.
– Шкеже иктаж театрын шындыме тиде спектакльжым онченда мо?
– Уке, мый нигунам ом ончо. Тудым шындымеке, вара ончалаш лиеш.
– Режиссёр семын пьесыш иктаж-могай ешартышым, оҥайым пуртенда мо?
– Тидым зритель каласышаш. Сандене чылаштым уло кумылын спектакльышке ӱжам. Мый ӱшанем, те чон канен воштылыда. Тунам ужыда, мом режиссёр ыштен. А чынжым гын режиссёрын пашаже койшашат огыл, чылажат ик тичмаш семын ончыкталтшаш.
– Декораций ойыртемалтше мо?
– Действий олаште кая, а рашрак каласаш гын, психотерапевтын кабинетыштыже. Кызытсе жапыште эрта манынат кертына. Сандене декораций пеш проста.
Спектакль кок шагат наре шуйна. Зрительым йӧршеш огеш нойыктаре, толза, ончыза.
Тыге кӱчыкын радамлыме паша шеҥгелне кугу паша «шылын». Текстым рушла гыч Зинаида Долгова кусарен. Тӱҥ рольышто – Марий Элын сулло артистше Павел Ефимов. Художник-постановщик – Сергей Таныгин. Музыкым Светлана Яндукова келыштарен.
Эльвира Терентьева.