Марий Турек район Кукрем ял гыч Виктория Иванова изинек туныктышо лияш шонен. Шонымашыже шукталтын – кызыт ӱдыр Йошкар-Оласе ик туныктымо рӱдерыште пашам ышта, изи ӱдыр-рвезе-влакым школлан ямдыла.
Йоча годсо шонымаш
Тӱҥалтыш класслаш В.Иванова Арбор школыш коштын, вара К.А.Андреев лӱмеш Карлыган школыш куснен. Виктория мураш да кушташ изинек йӧратен. Ялысе клубышто туддеч посна ик концертат эртен огыл манын аваже кызытат шыргыжал пелешта. Сценылан ӱдырым тусо тӱвыра пӧртыштӧ пашам ыштыше кокаже Любовь Борисовна шӱмаҥден.
– Мо шкем шарнем, эре туныктышо лияш шоненам. Тыге лектын, мыйын икымше туныктышем лач авам лийын. Тидат ончыкылык профессийым ойырен налмаште шке кышажым коден. Авамым тунемше-влак йӧратеныт да пагаленыт, уроклаште мутшым эре колыштыныт. Школым тунем пытарымеке, 10-15 ий эртымекат, выпускникше-влак йӧратыме туныктышышт дек уналыкеш эре толыт. Авамын пашаш чиен коштмыжо поснак келшен. Кажне гана урокышто тудым эскерен шинчымем годым «Авам семынак туныктышо, тудын гаяк шке пашам сайын палыше профессионал лийнем», – вуйыштем пӧрдын. Шонымашем илышыш пурталтын, да ойырен налме корнемлан ик ганат ӧкынен омыл, – ойла В.Иванова.
Иканаште – кок специальностьым
МарГУ-што Виктория марий йылмым да литературым, финн йылмым туныктышо специальностьым налын. Тиде жапыштак тӱҥалтыш класс педагоглан тунемын – изирак ӱдыр-рвезе-шамыч деке чонжо шупшын. Кечывалым студентке мужырлаште шинчен, а кастене университет пеленысе «Марий мурсем» ансамбльыш репетицийыш вашкен.
– Кажне ийын практикым Йошкар-Оласе тӱрлӧ школышто эртенна. Икымше тыгай практике годым Президентский школышто марий йылмым туныктенам. А Медведево посёлкысо 2-шо номеран школышто тӱҥалтыш классла дене икымше гана пашам ыштенам. Туныктышо-наставникем-влакат шке пашаштым палыше профессионал лийыныт. Садлан, практикым эртымеке, ойырен налме профессием эшеат чот йӧраташ тӱҥалынам, – ойла Виктория.
Университет деч вара
Университетым йошкар диплом дене тунем пытарымеке, В.Иванова Йошкар-Оласе ик туныктымо рӱдерыш ешартыш шинчымашым пуышо педагоглан пашаш пурен. Ынде нылымше ий 5-7 ияш изи падыраш-шамычым школлан ямдыла.
– Йоча-шамычын кугу кӱкшытыш шумышт мыйым пуйто шулдыраным ышта. Нуно мый декем лудын, возен, шотлен моштыдымо толыт. А идалык мучаште изирак ойлымаш-влакымат шке гыч лудын сеҥат, примерым решатлат. Икшыве-влакым школ илышлан эмоционально ямдылымылан тӱткышым ойырена: доска воктене выступатлаш, командыште пашам ышташ, икте-весе коклаште кылым муын мошташ туныктена.
Кажне йоча – тиде личность, тудын шке койыш-шоктышыжо, садлан кажне икшыве дек корным муын моштыман, – каласкала Виктория Радиковна.
Кызыт В.Иванова – ты рӱдерыште «Подготовка к школе» направленийын методистше да кураторжо. У преподаватель-влак дене пашам ышта, туныктымо методике-влакым ойыра да шкежат ямдыла. Тыгак скорочтений ден каллиграфийым туныкта.
Профессийже ӱдырлан куаным конда. Икшывын сеҥымашыжым, ача-аван тауштымыштым ужамат, ончыкыжымат тыгак тыршаш, шуаралташ, у кӱкшытыш шуаш кумылаҥам манын палдарыш Виктория да ешарыш:
– Пеҥгыдын каласен кертам: туныктышо лияш – тиде призваний. Икшыве-влакым, шке пашам йӧратыше, йоча дене кылым муын моштышо еҥ гына сай преподаватель лийын кертеш, шонем. Йоча занятийыш куанен толеш гын, туныктышо шке пашажым сайын ышта. Мый пеҥгыдын йодшо, но поро кумылан Виктория улам манын палемдат тунемшем-влак. Кажнышт верч тургыжланем. Изирак йоча-влакым туныкташ йӧным муын моштыман, нунылан модмо семын шинчымашым пуыман. А мый тыглай огыл занятийым, модышым, материалым шонен муаш моткоч йӧратем.
Паша деч вара В.Иванова жапым ешыж дене эртара, пӱртӱсыштӧ лияш йӧрата, яндар южышто йолын коштеш, лудеш. Эше тудлан тутло когыльым кӱэшташ, у рецепт почеш сийым ямдылаш келша. Ончыкыжым ӱдыр интернет аланыште шке сайтым але тӱшкам ыштынеже, тудын гоч пашаже, материалже, урокшо-влак дене молымат палдарынеже. Эше ик кугу шонымаш – йоча-влакым школлан ямдылаш шке кабинетым почаш. Тидыже шукталтешак, вет Викториян пашаже – чонжылан келшыше.
В.Иванован альбомжо гыч налме фото.