Кӧлан ача-ава-шамыч шке икшывыштым ӱшанен кодат? Йоча-влакым кӧмыт вара ончен кертыт? Тидлан лӱмынак тунем лектыт мо?
Чыла нине йодышлан вашмутым муаш Марий Турек посёлкышто илыше да «Кадры» нацпроект почеш тунем лекше Надежда Бычкова дене мутланышна.
Тудо Марий Турек районысо Калыклан паша верым ситарыме шотышто пӧлкан Марий кугыжаныш университетыште организоватлыме специализированный курсышто тунем лектын. Тидын нерген Надежда Олеговна тыге каласыш:
– Мый ынде 2015 ий годсек Марий Турек районышто Калыкым социально обслуживатлыше комплексный рӱдерыште социальный паша шотышто специалистлан пашам ыштем. Паша келша, вет тиде профессийланак икмыняр ий ончыч Волгатехысе «Социальная работа» факультетыште тунемынам.
Йочам ончышо няне-влак кӱлмӧ нерген пален налмеке, ешартыш шинчымашым налаш кайышым. Тиде 72 шагаташ курс 19 июнь гыч 15 июль марте шуйнен. Тунемаш мылам моткоч оҥайын чучын: мыланна шуко теорийым туныктеныт, практический занятийым эртареныт. Кызыт ынде «няне» пашам совместитель семын шуктем. Йодмаш шукыжак огыл, но лиеда. Вет ялысе вершӧрлаште ятыр ача-ава коча-ковалан, тыгак родо-тукымжылан шке икшывыжым ӱшана. Южгунам чынже денак ньогаштым нигӧ дене кодаш. Тунам вара тиде услугын кӱлешлыкше нерген шарналтат да мыйын гай специалист-влакым ӱжыт. Мыланна иканаште кум ияш марте кок икшывым ончаш лиеш. Жапше палемдалтын: кум шагат марте веле.
Комплексный рӱдерыштына изирак йоча-шамычлан книгам да тӱрлӧ могырым шуарыше модыш-влакым налынна. Нуным мый няне семын пашам шуктымо годым пеленем налам да яра жапыштым пайдалын эртараш тыршем.
Социальный няньылан тунемаш шонышо-влаклан теве мом каласем: тиде пашаште эн тӱҥжӧ – йочам йӧратыман. Тыгак няньылан шке мутым кучышо, поро кумылан, чын верч шогышо да ару лийман.
Социальный няне-влак йочам тыглай ончат гына огыл, ешлан квалифицированный полышым пуат. Ешартыш курсышто йоча психологийын негызшым умылтареныт, икымше медицине полышым пуаш тӱрлӧ йӧным туныктеныт, икшывын лӱдыкшыдымылыкшӧ шотышто правил-влакым ушештареныт, тыгак тӱрлӧ ийготан ньога-шамыч дене ты але вес ситуацийыште кузе лийман, тидлан мом палыман – чыла рашемденыт. Йоча-влакын ийготышт, койышышт да моло шотыштат ойыртемыштым шотыш налаш туныктеныт. Вет чыла тидыже няньын пашаштыже кӱлеш лийын кертеш.