Лӱмгечыште медальым кучыктеныт

Йылмым, литературым да историйым шымлыше В.Васильев лӱмеш Марий шанче шымлыше институтышто лӱмлӧ йылмызе, лингвист, шочмо калыкнан акрет годсо тиштыжым (писменность) шымлымашке кугу вийым пыштыше О.А.Сергеевын 60 ияш лӱмгечыжлан пӧлеклалтше «йыргешке ӱстел» эрта.

Погынышо-влакым Олег Арсентьевичын тиде кечылаште савыкталтше «Язык памятников письменности марийского языка» книгаж дене палдареныт. Тудым МарНИИЯЛИ, Тӱвыра, печать да калык-влакын пашашт шотышто министерствын, Марий калык конгрессын полышыж дене лукмо. Книгаште XVII-XVIII возыктышым шымлыме. Сандене тудо марий калыклан шкешотан памятник семынак шерге.

‌Пайрем погынымаште лӱмгече озам шукын саламленыт.

Марий Эл правительстве вуйлатышын икымше алмаштышыже М.Васютин саламлышыжла О.Сергеевын оҥышкыжо «За заслуги перед Марий Эл» орденын медальжым пижыктен.

МарНИИЯЛИ директор, Марий Эл Кугыжаныш Погын вуйлатышын алмаштышыже Е. Кузьмин пӧлек дене пырля Кугыжаныш Погынын Чап грамотыжым кучыктен.

Поро шомакым тӱвыра, печать да калык-влакын пашашт шотышто министрын алмаштышыже И.Садовин, Кугыжаныш Погын депутат, Марий тӱвыра рӱдерын вуйлатышыже ойленыт, пӧлекым кучыктеныт.

Морко землячестве лӱм дене Л.Иксанова, Т.Степанова саламлат

«Кугарня» газет редакций коллектив да тӱжем дене лудшо-влак лӱм дене предприятийын вуйлатышыже Э. Иманаев Олег Арсентьевичлан марий газетым эреак налын, лудын шогымыжлан тауштен, молыланат марий савыктышлан тыгай ӱшанле лияш тыланен ойлен.

‌Пайрем саламлымаш деч вара шанче конференцийыште юбилярын илыш корныжо да шымлыме пашаже дене палыме лийыныт.

Эдуард Иманаев.