Медведево район Лӱльпан йоча рӱдерыште икшыве-влак кузе илат? Жапым пайдалын эртарат мо? Вет кажне арнян тушто уш-акылым пойдарыме, кӱлешан мероприятий-влак лийыт.
27 ноябрьыште Лӱльпан йоча рӱдер гыч икшыве-влак Йошкар-Оласе «Ший пӱян Пампалче» марий йомак тоштерышке экскурссий дене миен коштыныт. Йомак герой-влак дене палыме лийыныт. А 28 ноябрьыште Лӱльпан йоча рӱдер 84 ий теммыжым палемден. Кастене тудын актовый залыштыже ача-ава деч посна кушшо тӱрлӧ ийготан икшыве-влак концертым ончыктеныт, модыныт.
4 декабрьыште рӱдерышке Йошкар-Оласе медколледжысе студент-влак толыныт, подростко-влаклан вашлиймашым эртареныт. Тамакым шупшмын аярже, аракан айдемын организмжым кузе локтылмо шотышто ойленыт. Алкоголизм теме дене кылдалтше фильмым ончыктеныт.