22-25 ноябрьыште Москошто Российысе студент отряд-влакын слётышт эрта. Тушко Марий Элын эн чолга молодёжьшат тарванен. Нуно кундемна нерген палдараш тӱҥалыт.
Ты слётыш элнан тӱрлӧ кундемже гыч эн чолга, чулым самырык ӱдыр-рвезе-влак погынат. Тений Российысе студент отрядын движенийжылан 65 ий, а тудым учредитлымылан – 20 ий. Палемдыман, ты движенийын пашаже проектым возымаште да чоҥымаште веле огыл. Тудо самырык еҥ-влакым тӱшка пашалан кумылаҥда, патриотизм шӱлышым пеҥгыдемда, Шочмо эл верч тыршаш тарата. Отрядыште улшо студент-влак ятыр ӱдыр-рвезе-шамычлан пример улыт.