Марий Элым ыштымылан 105 ий темме лӱмеш пайремым эртарыме шотышто заседанийым республикым Вуйлатыше Юрий Зайцев 19 августышто эртарен.
– Ты лӱмгече – регионышто илыше-шамычлан кугу пайрем. Тудо икоян улмым, эртыме корным жаплымым да республикын шумо кӱкшытшӧ дене кугешнымашым ончыкта. Тиде пайрем историйым шарналташ амал веле огыл, тыгак Марий Элым вияҥдымаште да тӱзатымаште тыршыше-шамычын надырыштым палемдаш йӧн, – ойлен республикым Вуйлатыше.
Заседанийыште лӱмгечылан пӧлеклалтше мероприятий-влак планым рашемденыт. Правительстве Председательын алмаштышыже – тӱвыра, печать да калык-влакын пашашт шотышто министр Константин Иванов 105 ий темме пайремлан ямдылалтме нерген каласкален. Чылаже 50 наре событийым эртараш палемдыме. Ик эн тӱҥлан Всемарийский йоча коллектив-влакын концертыштым шотлыман: хор, калык семӱзгар оркестр, симфонический оркестр, «Волгенче» куштымо ансамбль. Тудо Э.Сапаев лӱмеш Марий кугыжаныш академический опер да балет театрыште лиеш. Республикысе чыла районыштат мероприятий-влак эртаралтыт.
Лӱмгече пайремым 29 августышто Марий Элысе Калык-влак келшымаш пӧртыштӧ тӱҥалыт, тушто «Народы России. Большая семья – общая история» кугу ончер проект почылтеш. Экспозицийыш 100 наре ойыртемалтше артефактым чумырымо, нунын коклаште – пӧръеҥ да ӱдырамаш костюм-влак, живопись, графике, декоративно-прикладной сымыктыш предмет-шамыч.
Формат шот дене мероприятий-влак ойыртемалтше лийыт: экологический акций гыч тӱҥалын «Артекыште» Марий Элын кечыжым эртарыме марте. Москошто «Россия» национальный рӱдерын площадкыштыже регионым ыштымылан 105 ий теммылан пӧлеклалтше «Зимняя сказка» ончер почылтеш.
Запорожский областьысе Куйбышевский районыштат ты пайремым палемдат, тушко республикысе Тӱвыра, печать да калык-влакын пашашт шотышто министерствын концерт бригадыже кая.
Республикым ыштымылан 105 ий теммылан лӱмын логотипым ямдылат. Юрий Зайцевын кӱштымыж почеш шарнымаш медаль проектым ыштыме, 105 тыгай медальым лукшаш улыт.
Марий Элым Вуйлатышын пресс-службыжын фотожо.