🎗Чапланыше парашютистке Совет парашютистке, тӱшка дене тӧрштылмаште тӱнян рекордсменкыже Надежда (Ната) Васильевна Бабушкинан (1915-1936) шочмыжлан таче, 14 мартыште, – 110 ий.
Ӱдыр Кострома олаште шочын-кушкын. Москосо Рӱдӧ физкультур институтышто тунемын. 1934 ий гыч Рӱдӧ аэроклубын парашютист-влак тӱшкаштышт шоген. Вич коллегыж дене пырля Ната 1935 ийыште тӱнямбал рекордым шынден – 7035 метр кӱкшыт гыч кислородный прибор деч посна тӧрштен. Спортсменкекомсомолкым Йошкар Знамя орден дене наградитленыт.
1936 ий июньышто Ната Бабушкина парашютистке Галина Пясецкая дене пырля ЙошкарОлашке МАО-лан 15 ий теммым пайремлымашке толын. Показательный выступлений годым 800 метр кӱкшыт гыч тӧрштымӧ годым парашютшо 40 метр кӱкшытыштӧ веле почылтын.
Врач-влак ӱдырын илышыжым утарен кодаш кум кече толашеныт, но 27 июньышто лечебный амбулаторийыште колен.
Ты оралтын окнаже Йошкар-Ола скверыш лектын. Вара ты скверлан Ната Бабушкинан лӱмжым пуымо. 1958 ийыште тушто парашютисткын бюст-памятникшым шогалтыме. Ик метр кӱкшытан бюстым кок метр кӱкшытан кермыч постаментыш вераҥденыт. Авторжо – К.И.Баженов. 1983 ийыште мрамор бюстлан вашталтыме, авторжо – Е.И.Панфилов. 2013 ийыште постаментым уэмдыме, йыр улшо кумдыкым сылнештарыме.
📓Йошкар-Ола администрацийын материалже почеш ямдылыме.