Ик идалык ончыч «Защитники Отечества» фондын Марий Элысе пӧлкаже Марий кугыжаныш университет дене пырля сомылым виктарыме шотышто ойпидышым ыштен.
Тудын почеш патриотический событиян икмыняр мероприятийым эртареныт. Кызыт пӧлкам вуйлатыше Р.Магсумов ден вузын ректоржо М.Швецов спецоперацийысе ветеран-влакым тӱрлӧ пашалан кумылаҥдаш кутырен келшеныт. Нуно лишыл жапыште спортын ик видшылан туныкташ палемденыт. Салтак-шамыч пикш гыч лӱйкалаш кумылан улыт. Вет «Защитники Отечества» фондын Кубокшо верч программыш тиде видым пуртымо.
Пикш гыч лӱйкалымаш дене турнирым эртараш кеҥеж мучашлан палемдыме. Тидыже округысо Кубок таҥасымашлан ямдылалташ полшышаш.