«Специальный военный операцийыште лийме икымше кече гычак тудо шкенжым Шочмо элым аралымаште ӱшанле боевой йолташ семын ончыктен.
Тӱрлӧ боевой задачым шуктымаште, лӱйкалымаште, неле илыш условийыште тудо шкенжым лӱддымын куча, оружийым моштен кучылтеш да моло военослужащийлан пример лийын кодеш. Лач тыгай койыш-шоктышан еҥ-влаклан кӧра Кугу Отечественный сар годым мемнан ветеранна-влак фашист армийым сеҥеныт, тугеже меат нацизмым чарен кертына!» – тыге возен рядовой Р.В.Демидов нерген бригаде командирже гвардий подполковник А.Буйлов Марий Элым Вуйлатыше Ю.Зайцевлан колтымо таумут серышыште.
Шукерте огыл У Торъял районыш паша дене миен коштмыж годым Ю.Зайцев Роман Демидовын ешыж дене вашлийын да ты таумут серышым кучыктен. «Шотан айдемым, чын пӧръеҥым, пелашым, ачам Шочмо элын патриотшым куштымылан тыланда таум каласем», – ойлен тудо Р.Демидовын аваже Зоя Ивановналан.
У Торъял район Чӱксола ялын эргыже Роман Демидов «Первый Май» колхозышто пашам ыштен. Елена пелашыж дене ныл икшывым ончен куштат. Ӱмаште 26 сентябрьыште контрактым подписатлымеке, тудо СВО-ш каен. Шукерте огыл Роман Самара олаште эмлалтын – йолжо сусырген улмаш, тылеч вара тудым уэш Запорожский областьыш колтеныт.
– Мемнам Романын йолташыже палымым ыштен. Икымше гана ужмекак, йӧратен шынденам манын ойлат южо мужыр-влак. Мемнанат тыгак лийын. Роман пеш чулым. Вашлияш тӱҥалмекат тудо, нимом шылтыде, шонымыжым тура каласа ыле. Тидын денак кумылем савырен. Ик ий келшымеке, 2008 ийыште сӱаным ыштенна. Ныл икшывым куштена. Ульяна 14 ийым темен, Макар 11 ияш, Василиса куд ияш да ик ийым эрталтыше Агата куандара.
Иктаж-мом шонен пышта гын, Рома жапым ок шуйкале, шонымыжым илышыш пурташ пижеш. Контрактым подписатлаш шонымыж нергенат тудо нигӧлан каласен огыл. Кӱлеш документым поген, медосмотрым эртен да «Мый каем» манын мыланна каласен. Тыгай годым тудлан кеч-мом ойло, шкенжыным садак ышта, – манеш Елена.
Пелашыжын СВО-ш кайымекыже, Елена ныл йоча дене кодын, изи Агаталан тунам пел ий гына лийын. Йӧра эше Роман аваже, Зоя Ивановна икшыве-влак дене шогылтеш, Елена колхозыш презым ончаш коштеш. Ик идалык суртыштышт тургыжланымаште, шонкалымаште эртен. Зоя Ивановна эргыж нерген йӱдшӧ-кечыже шона, шинчавӱдшым уныкаже-влак деч йышт гына ӱштылеш.
– Кеч-могай сомылым ыштем гынат, эре Рома нергенак гына шоныкта: кузерак тудо, таза мо. Мӧҥгыштӧ ойгырен кошташ огыл манын, пашаш ондакрак лектым. Зоя Ивановна тургыжланымашыжым уныкаже-влаклан ок ончыкто гынат, эргыж верч коляна.
Роман чӱчкыдын йыҥгырташ йӧнжӧ уке. Йыҥгырта гынат, шуко кутырен ок керт. Арнялан ик гана «Мыйын чыла сай, ида ойгыро» манын, смс серышым возен колта. Командиржын Юрий Викторовичлан колтымо серышыж нерген ме пален огынал, Романланат командиржат тидын нерген нимом каласен огыл. Садлан мемнам Марий Элым Вуйлатыше дене вашлиймашке ӱжмылан моткоч ӧрынна, мыланна тиде вучыдымо лийын, – ойла Елена.
Ме лӱддымӧ, виян землякна Роман Демидов дене кугешнена да ӱшанена: ты неле пагыт эрта да Демидовмыт шке герой эрге, пелаш да ачашт дене вашке вашлийыт.
И.Речкинын да еш альбом гыч налме фотожо.