КУШНА ЯЛЫН ГЕРОЙЖО-ВЛАК
Морко районысо Изи Кушна ял мотор пӱртӱсшӧ, ший вӱдан Ировка (Йырвӱд) эҥерже да поро кумылан, пашам йӧратыше калыкше дене ойыртемалтеш. Кажне айдеме шке шочмо вержым йӧрата да калыкше дене кугешна. Мыланнат тиде кундемын икмыняр шочшыж дене кугешныманак. Мутем Изи-Кушна ялыште шочын-кушшо да Украиныште спецоперацийыште вуйым пыштыше патыр эрге-влак Виктор Иерусланович Яковлев, Руслан Владимирович Семенов да Михаил Валерьевич Михайлов нерген.
Эн ончыч Виктор Яковлев нерген каласкалем.
Виктор Яковлев 1980 ий 23 мартыште тыглай ешыште шочын-кушкын. Ачаже Иеруслан Викторович верысе «Киров» лӱмеш озанлыкыште водительлан ятыр жап тыршен, аваже Элла Аркадьевна ялысе кевытыште пашам ыштен. Ешыште кум икшыве кушкын, Витя эн кугужо лийын. Шордӱр кыдалаш школым тунем пытарымеке, ачаже семынак водитель лиеш, варажым армий радамыш логалеш. 2003-2005 ийлаште Йӱдвел Кавказыште службым эрта. Ешым чумырымекат, контракт почеш службыжым шуя. Тыге 2015 ийыште 2777 войсковой часть дене контрактым пеҥгыдемда да Чечня мландыште служитла. Мӧҥгышкыжӧ кертмыж семын веле толеш. Толмекыжат, яра шинчен огыл: пачерым олмыктен, шочмо суртшымат эреак тӧрлен шоген. Тудын кид-йолжо чыла пашаланат тале лийын.
Спецопераций тӱҥалмеке, икымше кече гычак элнан моло танкистше дене пырля Витя Запорожский областьысе Энергодар олаште нацист-влак ваштареш талын кучедалын. Пырля служитлыме йолташыже-влакат Яковлевын икымше радамыште танкым устан виктарымыже, ончыко лӱддымын кайымыж нерген ятыр гана ойленыт. 2022 ий 4 мартыште Витян танкше тушманын вулно йымакше логалын, тыге лӱддымӧ марий танкистын ӱмыржӧ кӱрылтын…
Виктор Иерусланович Яковлевым шарнен, Шордӱр школ пырдыжыште шарныктыш оҥам пижыктыме, Олеся пелашыжлан марийжын Патырлык орденжым кучыктымо. Лӱддымӧ, патыр марий танкистын ӱдыр ден эргыже ача деч посна кодыныт. Витялан марий калыкын «Изи да туш» ойжо моткоч келшен толеш. Мемнан шӱмыштына тудо лачшымак тыгай кодеш…
КУШНА ЭРИК.
В.Яковлевын альбомжо гыч налме фото.