Советский район Вечын села гыч Сергей Ямбаев – специальный военный операцийын участникше, ефрейтор, танковый батальонышто служитла, Луганск Калык Республикыште порысшым шукта.
Сергейлан ӱмаште октябрьыште повестке толын. Тылеч ончыч пӧръеҥ ик фабрикыште погрузчик-машинистлан ыштен.
– Повесткым кидыш налмеке, лӱдын шоген омыл, но тургыжланенам. А эн чот Ирина пелашем ойгырен. Кызыт ме кум шочшан улына, а тунам Кирилл эргына аважын мӱшкырыштыжӧ гына лийын, садлан шуко шочшан ача семын мый мӧҥгыштӧ кодын кертын омыл, – каласкала С.Ямбаев.
Закон почеш, мӱшкырыштӧ кийыше аза 22 арням эртыше гын веле, кӱлеш документым ямдылен, пӧръеҥ кум икшыван ача семын СВО-ш кайыде серлага.
Ульяновск областьыште тунеммашым эртымек, тений 17 январь гыч С.Ямбаев – СВО кайыме верыште. Армийыште срочный службым эртымыж годым танкист лийын, садлан шошым тудым танковый батальоныш кусареныт.
– Передовой линий воктене танкыште боевой дежурствышто улына. Тӱрлӧ ситуаций лиеш. Мом шылташ, южгунам чот лӱдмашан – окмак веле ок лӱд. Кунам гын йолат чытыра, тыгодым газ педальым эше чотрак тошкалат да мом ыштышаш улат, тудым шуктет, – манеш пӧръеҥ. – Но эн йӧсыжӧ тиде огыл – мӧҥгӧ, еш деч тораште кужу жап илаш эн нелын чучеш. Тиде ик ий жапыште илышыштем кугу савыртыш лийын манын кертам, мый шкежат вашталтынам.
Ноябрьыште С.Ямбаевын икымше отпускшо ыле. Кузе тудо тиде жапым чот вучен! Вет апрельыште Ямбаевмытын эн вучымо изи падырашышт, Кирилл эргышт, шочын. Шым тылзе эртымек гына ача тудым кидышкыже налын, оҥжо пелен ӧндалын.
– Тиде татым нимо дене таҥастараш, мут дене каласен мошташ ок лий. Конешне, апрельыште эргым шочмеке, кӱлеш документым ямдылен, мӧҥгӧ толын кертам ыле. Но мый туштат кӱлам, боевой йолташем-влакым кузе кодем? – ойла С.Ямбаев.
Отпускыш толмыж нерген Сергей ешыжлан ойлен огыл. Лач ачажлан гына ончылгоч йыҥгыртен да машинаштыже оравам телымсылан вашталташ йодын. Ямбаевмыт геройыштым декабрьыште вученыт. Вич ияш София да кум ияш Вика тудо кечын йочасадыште лийыныт. Сергейым омсалондемыште ужмеке, пелашыже шортын колтен.
Еш, родо-тукым дене вашлийын, жапым пырля эртарен, отпуск моткоч писын эртен каен. Кызыт Сергей Ямбаев – СВО кайыме верыште. Шке порысшым лӱддымын шуктымыжлан ефрейтор С.Ямбаевым «За боевые заслуги», «За боевые отличия», «Участнику специальной военной операции» медаль-влак дене палемденыт.
«Вашке – У ий. Ты пайрем вашеш лишыл еҥет-влаклан мом тыланет?» – йодым Сергей деч.
– У ийым ешем деч тораште икымше гана вашлиям. Тиде кумылым волта, но мый умылем: жап тыгай. Ты пайрем вашеш ешемлан чытышым тыланем. Пырля служитлыме йолташем-влаклан – вий-куатым, вуй ӱмбалне тыныс кавам, – вашештыш пӧръеҥ.
Чынак, тек вуй ӱмбалнына эре тыныс кава лиеш. Пелашыжым, иза-шольыжым, эргыжым вучышо кажне еҥ тек вашкерак шке геройжым вашлиеш.
С.Ямбаевын альбомжо гыч налме фото.