Йошкар-Олаште тений «Свет» волонтёр отряд пашажым виктараш тӱҥалын. Тудым Йошкар-Олаштак шочын-кушшо самырык еҥ Иван Купсольцев вуйлата. И.Купсольцевын волонтёр отрядым ышташ шонымашыже эше ӱмаште шочын улмаш.
– «Свет» отряд пашам ышташ тӱҥалын веле. Да кызытеш эше официально регистрироватлалтме огыл. Коллектив шотыштат шкет веле улам, – ойла Иван. – Айдемылан могай-гынат полыш эре кӱлеш. Тазалыклан кӧра, мутлан, пӧртым эрыкташ, кевытыш сатум налаш каяш йӧн уке, але тора кундемыш каяш шонышо-влак ныл йолан йолташыжым кушко кодаш огыт пале. Тыгай годым ме полшена. Пӧртымат эрыктен кертына, шкафымат погена, пийым але пырысым уремыш луктына, пукшена, пеледышыш вӱдым оптена, але эше иктаж-могай бытовой пашам ыштена.
«Свет» волонтёр отряд ола мучко еҥ-влаклан яра полшаш ямде улмыж нерген увертарымаш-влакым пуэн. Тылеч посна Сталинград кредалмашын геройжо-влак да Кутрухин уремласе кок кевытыште «Порылык яшлыкым» вераҥден. Еҥ-влак полыш кӱлмӧ нерген ты яшлыкыш йодмашым возен кертыт. Кажне кастене Иван Купсольцев яшлыкым почеш да йодмаш-влакым пога.
– Тӱняште порылык пашалан вер шукырак лийшаш. Ончыч пионер-влак шоҥгыеҥ-влаклан, начар тазалыкан айдемылан сурт-печыште тӱрлӧ сомылым ышташ полшеныт. «Свет» отрядын еҥже-влакым кызытсе жапын тимуровецшылан шотлаш лиеш. Кеч мый шкет кызыт тиде отрядыште улам, ӱшанем, ончыкшым тимуровец радамыш шукырак самырык еҥ ушна, – манеш И.Купсольцев.
Иванын мутшо почеш, айдеме пиалан лийже манын, шукыжат ок кӱл.
– Мутлан, шкет илыше шоҥгыеҥлан южгунам чон почын мутланашат нигӧ дене. Мылам калыклан социальный адаптаций комплексный рӱдер гыч йыҥгыртеныт да ик кова нерген каласкаленыт. Ковалан шкетшылан йокрок. Тудын дене пырля жапым эртараш кӱлеш. Тиде кова дене мый вашлийынам. Тӱрлӧ темылан мутланенна, аптекыш, кевытыш пырля миен коштынам. Шоҥгыеҥ пеш куанен да мылам таумутым ойлен. Тугеже ыштыме пашам арам огыл, калыклан пайдам конда, – каласыш «Свет» отрядым вуйлатыше.
И.Купсольцев пашалан кожмак. Кид-йолжо чылалан толеш. Поснак кочкаш тамлын шолтен мошта. Тидлан тудо Йошкар-Оласе торгово-технологический колледжыште тунемын. Тылеч посна Иван – «ЛизаАлерт» кычалше да утарыше отрядын волонтёржо. Поро пашам шуктымыж дене тудо шке йырже ятыр доброволецым чумырен кертеш манын ӱшана.
Еш альбом гыч налме фото.