Марий Элысе МВД-н самырык пашаеҥже-шамычым йотэл гражданин-влак дене кутыраш туныктеныт.
Ведомствын профессиональный подготовко рӱдерыштыже тидын шотышто занятийым эртареныт, тушко общественник-влакат ушненыт. Регионысо МВД-ште тыршыше-влак полиций пашаеҥ да йотэл гражданин коклаште профессионально значимый ситуацийлаште кылым ыштен моштымым шуарыме йӧн-влак дене палдареныт. Тиде темылан доклад-влакым МВД-н личный составше дене паша шотышто управленийжын пашаеҥже-влак Т.Овдина ден Ю.Востокова, тыгак МВД Интерполын национальный рӱдӧ бюро группыжын вуйлатышыже Е.Рыжкова да МВД-се общественный советын еҥже Р.Золотухин ыштеныт.
– ОВД пашаеҥын профессиональный пашаштыже йотэл гражданин дене кылым муын моштымаш да умылымашке шумаш ик эн тӱҥ верым налын шогат. Тӱнямбал кӱкшытан тӱрлӧ тӱшка мероприятийлан ямдылалтме да нуным эртарыме процессыш полиций пашаеҥ-влакат ушнат, – палемден МВД-се профподготовко рӱдерым вуйлатыше А.Демаков.