Каркаде – гибискус пеледыш дене ямдылыме чай. Ты кушкылышто тазалыклан пайдале тӱрлӧ органический кислота уло. Калык медициныште гибискусым бактерийым пытараш, шондым, шекшым лукташ, вӱр йогымым чараш, пуалмым пытараш полшышо йӧн семын кучылтыт.
Кылмен черланыме годым, поснак температур кӱзен гын, шукырак вӱдым йӱман. Каркаде чай организмым пеҥгыдемдаш да вашкерак тӧрланаш полша, тӱрлӧ эм шудым ешараш гын, эшеат сай.
200 мл шокшо вӱдыш ик кугу совла коштымо эҥыжым да ик изи совла чайым пыштыман, 20 минут шинчыктыман да шӱрыман. Шокшо лемым 200 мл дене кечеш кок гана йӱман.
Коштымо эҥыжым, писте пеледышым да каркадем ик кугу совла дене налман. 200 мл шокшо вӱдыш ик кугу совла ты шудо вартышым пыштыман, 20 минут шинчыктыман да шӱрыман. Шокшо лемым кастене малаш вочмо деч ончыч йӱман.
Термосыш пеллитр шокшо вӱдыш кок кугу совла тыгыдемдыме шуанвондо саскам да ик кугу совла каркадем пыштыман, ик шагат шинчыктыман да шӱрыман. Вара лемыш ик-кок кугу совла мӱйым ешарыман. Шокшырак лемым 100-150 мл дене кечеш кум гана кочмо коклаште йӱман.
© КУГАРНЯ 2018 - 2024