Кодшо тылзын МарГУ-со «Воскресение» поисковый отрядлан 10 ий теммым торжественно палемдыме.
Ты жапыште отряд Российнан лу кундемыштыже (Ленинград, Тверь, Калуга, Мурманск, Новгород, Сахалин областьлаште, Марий Эл, Карелий, Крым да Карачаево-Черкесий республиклаште) пашам ыштен. Чылаже поисковик-влак 30 экспедицийыш миен коштыныт. Увер деч посна йомшылан шотлалтше 300 утла салтакым рашемденыт.
Лу ийыште отрядыште 67 студент кычалме пашашке ушнен. Поисковый толкынын историй тоштерыштыже 200 утла экспонат погынен. Тиддене отрядын еҥже-влак тунемше, студент да моло-влакымат палдарат. Нунылан 463 экскурсийым эртареныт.
Отрядын боецше-влак тӱрлӧ пашам шукташ 1439000 теҥгеаш кандаш грантым налыныт. Тылеч посна 10 ияш лӱмгечыжлан эше ик кугу пӧлек лийын – Росмолодёжь «Дорога Памяти» проектыштлан 2023 ийыште 1 млн теҥгеаш грантым ойыра.