- 2025 ий эрвел гороскоп почеш Кишкын идалыкше лиеш. Тудын символжылан Ужар Пу Кишке шотлалтеш. Гороскопын сӧрымыжым шотыш налын, Ужар Пу Кишкын идалыкыштыже шочшо-влак тӱрлӧ ситуацийлан шкеныштым келыштарен моштат. Нуно тыгак поро кумылан да еҥ-шамыч дене кылым муын моштышо улыт.
Пайремлан ямдылалтына
Кажне озавате У идалыкым чын тӱҥалме шотышто шке семынже тургыжлана. Могай чесым пайрем ӱстеллан ямдылыман? Мом чийыман? Могай пӧлек дене лишыл еҥ-шамычым куандарыман?
Ӱстелым погена
Кишке – опкын-влак коклаш пурышо янлык. Садлан ӱстембалне шыл але кол гыч ямдылыме кочкыш лийшаш. Тудым тӱрлӧ пакчасаска дене сӧрастараш келшен толеш. Кишке пайрем чесыште просталыкым йӧрата. Тӱҥжӧ – тудо тамле да свежа лийшаш. Шушаш ийын символжо ужар тӱсан. Садлан тыгай тӱсан тарелке, бокал, салфетке дене ӱстелым сервироватлаш лиеш. Тыгак тӱрлӧ сӧрастарыш дене «модаш» уто огыл. Тидлан кок-кум тӱсым ойырыза да ӱстелым сылнештарыза!
Кол дене закуско
Селёдко кол гыч тарталетке-влак У ий ӱстеллан шкешотан ямым пуртен кертыт. Ты кочкыш тамле улмыж дене веле огыл, тыгак моторын сӧрастарымыж дене кумылым нӧлта.
Кӱлыт (10 тарталеткылан): 200 г лудымо селёдко кол, 1 йошкарушмен, 2 пареҥге, 2 кешыр, 1 вуй шоган, майонез, ужар кушкыл-влак.
Йошкарушменым, кешырым, пареҥгым ончылгоч шолтен ямдылыза. Лудымо колым шканда кузе келша, туге пӱчкедыза. Шоганым тыгыдемдыза. Шолтымо пакчасаскам эрыктыза да тёрко гоч нӱжыза. Тудым майонез дене варыза. Тарталетке пундашыш ончыч пӱчкедыме колым, шоганым, майонез дене варыме пакчасаскам пыштыза. Закускым ужар кушкыл дене сӧрастарыза.
Олма да апельсин дене кӱктымӧ лудо
Шокшо кочкыш деч посна пайрем ӱстелым шоналтышыжат огеш лий. Садлан У ийлан тамле рецепт почеш лудым кӱкташ темлена.
Кӱлыт: 2 кг нелытан лудо, 4-5 шадыргырак олма, 2 апельсин, шинчал, йоҥыштымо паприке, ош да шем пурыс, кориандр, асафетид, зира приправе-влак, 30 мл мӱй.
Лудым йӱштӧ вӱд дене сайын шӱалтыза. Уто вӱдым кагаз солык дене ӱштыл налза. Тудын кӱшыл ужашыжым, шулдыр ӱмбалжым кӱзӧ дене пӱчса. Олма шӱмым эрыктыза да кугу пӱчкышлан шеледыза. Апельсин шӱмым, томжым тыгак кораҥдыза да кубик семын пӱчкедыза. Ямдылыме олма ден апельсиным лудо кӧргыш оптыза, тӱрлӧ специй да мӱй дене йыгыза. Пӱйым эрыктыме тоя дене лудым пӱчмӧ верым петырыза.
Тудым рукавыш вераҥдыза, 180 градус марте ырыктыме духовкыш кок шагатлан кӱкташ шындыза. Шагат эртымеке, духовкышто шинчыше лудым савыралза. Лукмо деч 15 минут ончыч рукавым пӱчса, тыге шыл чевер тӱсан лиеш. Изиш йӱкшымеке, лудо кӧргӧ гыч олма ден апельсиным кораҥдыза. Тылеч вара тудым ӱстел покшеке шындыза.
Вургемым ойырена
У ийым мотор вургем, причёско, макияж дене вашлийман. Тенийысе идалыкын тӱҥ шонымашыже – просталык. Садлан, Кишкылан келшаш манын, уто сӧрастарышан, яргата нарынче, тӱкӧ, неон тӱсан вургемым чийыман огыл. Вургем айдемын тыматле, ушан, куштылго улмыжым ончыктышаш.
Ужар Пу кишкын идалыкшым шотыш налын, ты чия тӱсынак тӱрлӧ ойыртемжылан келшыше вургемым ойырыман. Нуно лыжга, волгыдо, куштылго лийшаш улыт. Икте-весышт дене келыштараш манын, шем тӱсым кучылташ келшен толеш. Яргата тӱс чонланда утларак келша гын, йошкарге але шӧртнялге тӱсан тувырым ойырен кертыда. Тыгай тӱсым кишке йӧрата. Вургемым ойырымыда годым тудым могай куэм гыч ургымымат шотыш налман. Кишке синтетике вургемлан сыренат кертеш. Садлан У ийым вашлияш сай качестван, натуральный куэман тувырым, платьым, блузкым чийыза.
Шушаш ий деч мом вучыдымыдам вургем гоч шижтарен кертыда. Тыге, мутлан, кугу оксан лийнеда гын, шӧртньӧ тӱсан вургемым ойырыза. Пайрем тувырын модельже ойыртемалтше лиеш гын, сайрак. Тыгодым тудын драпировкыжлан, ассиметрийжылан, оворкажлан, ургышыжлан тӱткышым ойырыза. Изи, шем тӱсан классический платье кишкын кумылжым огеш волто. Но тыгай тувырым чияш шонеда гын, жакет сынаным ойырыза. Тыге пайрем кумылым утларак пуртеда.
Маникюр ужар тӱсын тӱрлӧ ойыртемжылан келшыше лийшаш. Тыгак кӱчым лум пырче тӱсаныш чиялташ темлат. Йошкарге, шӧртнялге, перламутр тӱс-влак пайремлан эреак келшыше улыт. Тӱрлӧ тӱсан, тылзан маникюрым, френчым шукын ыштыктат.
Макияж моторлыкым пеҥгыдемдаш полшышаш. Тидлан тыматле, проста тӱсан косметикым кучылтман. Идалыкын символжылан келшыше тӱсым кучылтнеда гын, тудым ший тӱс дене келыштараш лиеш.
Причёско пайремлан келшыже манын, кудырташ лиеш. Голливудысо толкын кеч-могай пайремланат ойыртемым пурта. Тыгак кужу ӱпым, кӱшкӧ нӧлталын, поч семын кылдаш келшен толеш. Тӱрлӧ пучок, ретро укладке, мотор ӱппунем-влак модный улыт. Кӱчык ӱпан-шамычлан мокрый эффектан причёскым ышташ лиеш.
Пӧлекым ямдылена
- Ача-ава да родо-шамычлан газет ден журналлан подпискым, экскурсийыш але театрыш билетым, шарфым але шовычым, тӱрлӧ сӧрастарышым, книгам, кухньышто кучылташ келшен толшо техникым пӧлек шотеш налаш сай лиеш.
- Йоча-влаклан конструкторым, ӱстембал модышым, ечым, коньким, издерым, магнитный планшетым, квестыш билетым, усталыклан келшыше наборым пӧлеклаш келшен толеш.
- Йолташ да коллеге-шамычым пу гыч ыштыме карте, пушан шовын, пижаме, корнышто малаш келыштаралтше кӱпчык, чай але конфет набор, блокнот, книга дене куандараш темлалтеш.
Шотыш налман
Финансым кугемдаш манын, ешыште илыше кажне еҥын оксагалташкыже кугу оксам пыштыман.
У ий деч ончыч улшо парымым пӧртылтыман. Парышан еҥ-влак дечат налман.
Кожыш кугу оксам да кампеткым сакалтыман. Тыгак фольгаш пӱтырымӧ тыгыде оксам, модыш семын келыштарен, кожыш пижыктыман.
Уна-шамычын тарелка йымакышт 5 але 10 теҥгеаш тыгыде оксам пыштыман.
У ийым корнышто пайремлыше-шамычым лишыл жапыште романтике шӱлышан вашлиймаш вуча.
Пайрем йӱдым шым ужар сортам чӱкташ гын, ешан лийыда.
Ӱдыръеҥ шым йочалан пӧлекым ышта гын, йӧратымашым муэш да марлан кая.
1 январьыште вашлийме пий пиалым да йӧратымашым сӧра.
Ава лияш эн кугу шонымашда гын, суртышкыда У ийлан изи йочан ешым ӱжса.
Мӱшкыран ӱдырамаш ава лияш шонышо ӱдырамашым сийла гын, шонымаш шукталтеш.
Кож йымаке йоча вургемым але модышым пышташ гын, лишыл жапыште мӱшкыраҥыда.
У ийым лавыран пӧртыштӧ вашлияш огеш лий!
Кишке идалыклан, пӧртыштӧ кож шогышашак. Пушеҥгым шогалташ йӧн уке гын, суртым кож укш дене сӧрастарыза.
У ий кастене вургемым, полдышым ургаш ок темлалт.
У ий чесым сай кумыл дене ямдылыман.