Голландийыштат тыгакак кече лектеш, мардеж пуалеш, пушеҥге ужарга, пеледыш пеледеш, но шочмо-кушмо верыште чылажат сайрак. Тораште улмо годым тидыже утларак чот шижалтеш, умылалтеш. Валентина Васинкинан мурыжым колыштын, илыш корныжым шымлаш лиеш. Тудо йӧратыме ялжым, школжым, Марий Элжым огеш мондо, йотэлыште шÿм-чон гыч шолын лекше мурыжо-влакым мурен, шочмо верже дене кылым куча, шке йылмыжым арала.
…Марий ÿдыр йотэлыште нидерланд йылмым тунемын, ик отельысе рестораныште ик жап пашам ыштен. Варажым Инесса ÿдырышт шочеш. Кок тылзе гыч тудым ясльыш коштыкташ тӱҥалеш, а шкеже умбакыже йот йылмым тунемеш, экзаменым куча, уло вийжым ешлан пуа. Кум ий гыч Ванесса шочеш. Тео, йоча-влак таза, ушан-шотан кушкышт манын, пелашыжлан йоча-влакын кугурак лиймышт марте мӧҥгыштӧ лияш темлен. Кугырак ӱдыржылан 9 ий да изиракшылан 6 ий темымеке, пашаш лектын. Ончыч продавецлан, а ынде кокымшо ий рестораныште пашам ышта….
Валюша, ÿдыржö-влакым шке машинашкыже шынден, хореографий школыш але спортшколыш наҥгая. Инесса ден Ванесса ныл ияшышт годымак марафон куржталмаште шкеныштым тергат. Кузе уке гын, нунын аваштат Нидерландыште 2019 ийыште ÿдырамаш-влак коклаште 7 километрат пеле кужытан марафонышто кокымшо верым налын, тиде ийынак 21 километрым куржмаште таҥасен. А Францийыште Дисней Лейнд марафонышко ушнымышт пеш кугу шарнымашым коден да куаным конден. Вет тушеч 10 медаль дене пӧртылыныт: ачан – икте, ÿдыр-влакын – кокыт дене, аван – визыт…
…Шочмо йылме, марий муро Валялан йотэлыште йöратыме ешыж дене илашыже вий-куатым пуат, кумылым нöлтат, а Интернетлан кöра тораште улмыж гаят огеш чуч. Октябрьыште Вконтакте соцсетьын «Марий муро» лаштыкысе муро-влакым йÿклымӧ иктешлымаште Валентина Васинкинан «Шерге илышна» мурыжо икымше верым налын. Тений 4 ноябрьыште Валя «Читаем Чавайна на языках мира» акцийыш ушнен да «Ото» почеламутым марла ойлен. Шукерте огыл Ава кече вашеш «Таумут ок сите» лыжга у мурым лукто…
Валентина, яра мардеж шомак дене огыл, а ыштыш-кучышет дене марий йылмылан вуйын шогет, йотэл гычат марий калыкетым чапландарет. Тау тылат, ешге таза да кужу ÿмыран лийза, творческий корныштет утларак поэзий атыланыже, сылне мурсем шочшо, ты пашам шукташ Ош Кугу Юмо полшен шогыжо.
Вера Сорокина,
Марий Эл тÿвыран сулло пашаеҥже.
Тӱрыс текстым 2021 ий 8 январьыште лекше «Кугарня» газетыште лудса.