Федот коча ден уныка монча гыч толын пурышт веле, нунын почешак ола гыч Сашокын аваж ден ачаже толын шуыч. Куанже мыняре-е-е…
Теве чыланат мончаш пурен тольыч.
– Самырык-шамыч, Монча Кува ден Монча Кугыза лӱмеш лӧкамбалан вӱдан коркам шындаш ышда мондо чай? – Федот коча ӱдыржӧ да веҥыж деч йодо.
– Ачай, тидыжымак палена, уэш-пачаш ойлаш огеш кӱл, – Сашокын аваже йӱкшым кыдеж гыч пуыш.
– Тыгай-тугайым тыланда эреак ушештарен шогыман. Пешак шке семында ыштылаш йӧратеда. А вет кеч-монат шкенжын ыштыме шот-радамже уло.
– Ачай, тугакшат шот-радам дене ыштылаш тӧчена.
– Мыйже вет сайым шонен туныктынем. Вес гана ме огына лий гын, кӧ вара тендам туныкташ тӱҥалеш? – коча эплын ойла.
Зина кова шокшо монча деч вара йӱаш турнявӧчыжан да мӱян чайым ямдылен.
– Мӱй дене пырля турнявӧчыж вӱдым подылза. Пешак пайдале. Нуно коктын кӧргыда гыч шокшо мончаште шылын кодшо тӱрлӧ кӱлеш-оккӱлжым поктен луктыт. Осалым веле огыл, тӱрлӧ черым, кӱлеш-кӱлдымаш шонымашымат еҥын кӧргыж гыч Йошкар Кечын вийже дене пырля кожен колтат. Изиэм годым ковам тыгайым шу-у-уко йӱктен, – Зина кован мутшо пытыдыме.
– А тый эше ойло, кузе изиэт годым кок лӱман коштынат, – коча шинчажым пыч ыштен шырия.
– Ковай, тыйын лӱмет кокыт лийын? – Сашоклан оҥайын чучеш.
– Ик жап Зина огыл, а Ану лӱман коштым. Изиэм годым авам ден ковам мыйым ужален колтеныт, а у ешыште вес лӱмым пуэныт.
– Кузе туге ужален колтеныт? – ӧрын Сашок. – Чаманенат огытыл? А кӧлан ужаленыт?
– Чыган-влаклан докан, – коча тугак шырия.
– Пошкудо ялысе Серапи лӱман ӱдырамашлан ужален колтеныт. Варажым тудым эре Серапи авай манам ыле. Такшым тыште нимогай осал шонымаш лийын огыл.
Ешыштына эн изи, шымше, икшыве лийынам. Мый дечем ондак шочшо-шамыч изинекак икте почеш весе чылан колен пытеныт. Иктаж вич ияшрак лийынам докан. Кудымшо икшывым тойымо деч вара мыйым, пытартыш икшывым, йомдараш огыл манын, авам ден ковам «икшывым ужалымаш» йӱлам шуктеныт.
Эшежым, кутырашат пеш вараш тӱҥалынам, марий еҥ манмыла, ныл ияш марте йылмыдыме лийынам. Садлан палемдыме кечын эн ондак толшо еҥлан мыйым пуэн колтеныт, пуйто ужаленыт лиеш. Пошкудо ял ӱдырамаш, эртен кайышыжла, мемнан капка ончылан каналташ чарналтен да леве вӱдым подылаш йодын. Тыге авам ден ковам леве вӱдым йӱктымӧ дене гына серлаген огытыл, шокшо мелнамат пукшеныт да мыйымат кучыктен колтеныт, – каласкала Зина кова.
– Ковай, палыдыме еҥ деке каяш лӱдынат отыл? – шып колышт шинчыше Сашок йӱкшым лукто.
Елена Юнусова.
Умбакыже — 15 апрельыште лекше газетыште. Кевыт