Еҥ икшывым ешыш ончаш налмеке, приёмный ача-авалан йочам кузе чын воспитатлыман?
Тидын нерген психолого-педагогический, медицине да социальный полышым пуышо «Детство» рӱдерысе директорын социальный паша шотышто алмаштышыже Ольга Николаевна Кузьминых вашешта:
Мом ыштыман?:
- Икшыве могай, тугайым йӧратыман. Кеч-могай ситуаций годым йоча тидым шижшаш.
- Умылаш тыршыман: икшыве мом шона, тудлан мо кӱлеш, молан шкенжым тыге куча, а вес семын огыл.
- Тудо чыла шке ыштен кертеш манын ӱшандарыман: икшыве шканже, шке вийжылан ӱшана гын, чыла сай лиеш.
- Йоча удам ыштен гын, эн ончыч шкендам вурсышаш улыда.
- Икшывым кузе шонеда, туге ида «нӧштыл». Тудым воспитатлыме объект семын огыл, а личность семын ужман.
- Тудын ийготышто могай лиймыдам чӱчкыдын шарналтыза.
- Мут дене огыл, шке примерда дене йочам ончен куштыман.
Мом ышташ огеш лий?:
- Ончаш налме икшыве эн сай, чыла ыштен моштышо лиеш манын шоныман огыл. Тудо моло деч ны сай, ны уда огыл, тудо ойыртемалтше йоча.
- Ача-ава тудым йӧрата, чамана, варажым йоча деч тидымак, но утларак йодеш.
- Йочам ончаш налмылан таумутым ида вучо. Умылыман: икшыве тидым ышташ йодын огыл.
- Тудо тендан гай лиеш манын шоныман огыл.
- Ответственностьым туныктышылан, коча-ковалан ида кусаре.