Куштызо, хореограф-постановщик-влакын «Михаил Мурашко йолташыже-влакым ӱжеш» фестиваль-конкурсышт ынде поро йӱлаш пурен. Тений тудо латкокымшо гана эртаралтын.
Ты гана 46 коллектив (1000 утла участник) толын. Нуно Моско, Самара, Пензе, Рязань областьла, Татарстан, Чуваший да Марий Эл Республикла гыч лийыныт.
Фестивальым «Марий Эл» кугыжаныш куштышо ансамбльын чапле концертше дене почыныт. 29 мартыште Уфа оласе Файзи Гаскаров лӱмеш кугыжаныш калык куштымаш коллектив, 30 мартыште Липецк ола гыч «Казаки России» кугыжаныш куштышо театр ончаш толшо-влакым куандареныт.
Фестивальын программыже моткоч поян ыле. Мастер-класс-влакым, дискотекым, участник-шамычлан экскурсий-влакым эртырыме.
Участник-шамычын куштымо мастарлыкыштым жюри кум кече аклен. 31 мартыште сеҥыше-влакын лӱмыштым гала-концертыште рашемденыт.
Фестивальым Марий Эл Республикысе Тӱвыра, печать да калык-влакын пашашт шотышто министерствын полшымыж дене Калык усталык да культурканыш паша шотышто шанче-методик рӱдер эртарен.
Икымше гана толыныт да икымше лийыныт
Пензе ола гыч «Каблучок» калык хореографический ансамбль Йошкар-Олашке икымше гана толын да вигак Гран-прим сеҥен налын.
Тудо руш да тӱнямбал калык-влакын куштымашыштым ончыктен. Ты ансамбль тӱрлӧ кӱкшытан конкурсыш ушна да чӱчкыдын ончыл верыш лектеш.
Коллективым Оксана ден Павел Докиниыт вуйлатат. Окса Александровна ондак шкежат ты ансамбльын чолга участникше лийын. Тудо тыгерак ойла:
–Ансамбыльыш йоча-влакым ныл ияш гыч налына, ийгот шот дене чылажге индеш ийготан группына уло. Кушташ кумылан-влак 20-25 ийым эртышаш улыт. Кӧ тыште пелашым муын, нуно ешге коштыт. Репертуарна моткоч поян, тӱҥ шотышто тӱнямбал калык-влакын куштымашыштым да шке кундемнан ойыртем негызеш руш куштымашым тунемына. Тений фестивальыште премьерым ончыктенна. 45 еҥ толынна. Тӱрлӧ ийготан кок группым конденна.
Михаил Петрович Мурашко дене «Вензеля» ансамбльыш коштмо годымак палыме лийынна, гастрольыш ятыр гана пырля миенна. Сандене фестиваль-конкурсыш ансамбльым кондаш мыланем кугу пиал лийын.
Марий кундемын унам сайын вашлиймыже моткоч ӧрыктарен, мемнам кинде-шинчал дене вашлийыныт, кураторна фенечке-влакым пидын пуэн да мелнам кӱэштын конден. Ме ик марий куштымашым гына паленна, тудо икте гына шоненна, но, «Марий Эл» кугыжаныш куштышо ансамбльын выступленийжым ончымек, шуко у марий куштымаш нерген пален налынна.
Студент-влакын ансамбльышт
Моско областьысе Химки ола гыч Моско кугыжаныш тӱвыра институтын хореографий факультетшын «Новые имена» ансамбльже чапле куштымаш дене куандарен. Ты коллективым Анастасия Сергеевна Буцан вуйлата. Тудо ойла:
– Мый 2008 ий годсек калык куштымаш кафедрыште пашам ыштем. Ансамбльна 2022 ийыште шочын. Тудо классический, калык да современный хореографийым иктыш уша. Мемнан деке 1- 4 курсласе студент-влак толыт, сандене состав эре вашталтеш. Йошкар-Олаште кумшо гана улына. Эн ончыч самодеятельный коллектив, вара Моско губернийысе сымыктыш колледж дене толынна, тений институт гыч чолга ӱдыр-рвезе-шамычым конденам. Программылан кандаш номерым ямдыленна, нунын коклаште – руш да калык сценический, изи форман да ансамбль дене куштымаш-влак. Тыгак «Балетмейстер» номинацийыштат участвоватленна. Михаил Мурашко хореографический факультетын икымше деканже лийын, сандене ты фестиваль-конкурсышто участвоватлаш мыланна – кугу чап.
Марий кундемыште кугу кӱкшытан фестиваль-конкурсым эртарыме дене кугешнаш лиеш. Тышке толшо коллектив-влак ий гыч ийыш ешаралтыт. А эн тӱҥжӧ: марий мланде, калык да куштымаш нерген шукырак пален налыт налыт.