Марий Элыште талантан йоча-влакын мастарлыкыштым вияҥдыше «Волгенче» рӱдерыште 50 икшыве канен.
Тушто «Народно-сценический танец» смене мучашлалтын. «Лесная сказка» йоча лагерь пелен Морко, Звенигово, Шернур, Марий Турек йоча сымыктыш школла да клубла гыч, тыгак Йошкар-Оласе «Лира» йоча сымыктыш школ ден Национальный сымыктыш гимназий гыч 50 куштызо погынен.
Йоча-влак тушто куштымо технике дене палыме лийыныт, опытым погеныт. Нуно мастер-класслашке ушненыт, концертыште мастарлыкыштым ончыктеныт. Педагогышт «Марий Эл» кугыжаныш ансамбльым вуйлатыше А.Селиванов лийын.
Икшыве-влакын тазалыкым пеҥгыдемдыме, тыгак каныме мероприятий-влакат лийыныт. Смене «Будущее танцевального искусства Марий Эл» концерт дене пытен. Тудо 30 январьыште Йошкар-Олаште Я.Эшпай лӱмеш Марий филармонийыште эртаралтын.