«Финн-угор студенчествын миссше» тӱнямбал конкурс тений 9-12 декабрьыште Ханты-Мансийск олаште лиеш. Марий калыкын чапшым МарГУ-н студенткыже Мария Панкова арален да ойыртемалтын! Икымше вер дене тудым саламлена.
Йошкар-Олаште шочын-кушшо ӱдыр изиж годсек кушта. «Тиде хобби гына огыл, а кум ияш улмем годымак тӱҥалме паша. Сандене кызыт кушташ моткочак йӧратем, эре шуаралтам да у сеҥымашыш шуаш тыршем. Такшым XXI курымысо моло самырык еҥ семынак тӱрлӧ корно дене тунемам», – мане Мария.
Ӱдыр Йошкар-Оласе Экономико-правовой гимназий деч вара Марий кугыжаныш университетын «Цифровая реклама» направленийже дене кумшо ий шинчымашым пога. Тыгай англичан йылмым келгын тунемеш, а спортышто шкем иймашыште терга.
Шукерте огыл Мария графический дизайнлан кугу тӱткышым ойыраш тӱҥалын. А эше ик кугу шонымашыже уло – латин йылмым сайын палаш.
Тений ӱдыр «Российысе студенческий шошо» мероприятийыште лийын. Тушто талантан ӱдыр-рвезе-влак дене пырля марий калыкын философийжым почын пуышо да Марий кундемын моторлыкшо нерген каласкалыше спектакльым ончыктеныт.
Тылеч посна М.Панкова МарГУ пеленысе Йоча хореографий университетыште икшыве-влакым кушташ туныкта. Нунын дене пырля куана, энтузиазм шӱлыш дене ила да пашам ышта.
– Мый кум ияшак «Улыбка» йоча образцовый ансамбльыш кошташ тӱҥалынам. Варажым «Ассорти» эстраде куштымашын калык коллективышкыже ушненам. А кызыт йоча-шамычым ты сымыктышым йӧраташ туныктем, усталык шӱлышыштым почаш тыршем. Университетыште тӱрлӧ мероприятийыште шкем тергымаш студент-влак денат организатор семын пашам ворандараш полша. Мый шкемым чынжымак кугу ешын ужашыж семын шижам, вет тыште ме чыланат икте-весылан эҥертен кертына. Туныктымаш да конкурслаште таҥасымаш шке вийлан ӱшанаш полшат,да у йӧн дене тыршаш кумылым луктыт. Ончыкыжымат куштызо да педагог семын вияҥаш, сымыктыш корныш весе-влакым шке почешем наҥгаяш тӱҥалам, – каласкалыш Маша.
Марий тӱвыран ойыртемжым да сӧраллыкшым кумдан ончыктымаш – ӱшанен пуымо кугу паша. Мария кызыт тидлан кыртменак ямдылалтеш, вет калыкна поян да вургемжат мотор, арвержат шуко, йӱлажат оҥай.
Эльвира Терентьева.