1 ноябрьыште «Калык участковый-2022» Российысе конкурсын финальный этапше тӱҥалын. 10 ноябрь марте Интернетысе соцкыллаште «Российын эн сай участковый уполномоченныйже» лӱмым налаш кандидат-шамычлан йӱкым пуаш лиеш.
Марий Элын чапшым конкурсышто Россий МВД-н «Медведевский» межмуниципальный пӧлкажын участковый уполномоченныйже, полиций майор Татьяна Иванова арала. Тудо ты конкурсын регионысо этапыштыже эн шуко йӱкым поген.
Татьяна Павловна Киров олаште шочын. Йочаж годым ача-аваже Тюмень кундемыш илаш кусненыт, садлан ӱдырын школ да студент пагытше тушто эртен. Школышто тунеммыж годым Татьяна иймаш дене заниматлен, спортын ты видше дене таҥасымашлаште шкенжым терген. 11-ше класс деч вара, шке илышыжым спорт дене кылдаш шонен, тудо Тобольскысо кугыжаныш институтын спортфакышкыже тунемаш пурен. Дипломым налмеке, спорткомплексыште куд ий пашам ыштен.
2006 ийыште Татьяна Павловна ешыж дене Марий Элыш илаш куснен. Медведево район Знаменский посёлкышто пачерым налыныт.
– Администрацийыш мийымеке, тушто пашам ыштыше палыме еҥ посёлкысо административный участкыште участковый уке манын. А мый школ деч вара спортфакыш огыл гын, полиций паша дене кылдалтше профессийлан тунемаш шоненам ыле. «Молан каяш огыл?» манын шоналтенам да полиций пӧлкаш миенам. Тушто мыланем направленийым пуэныт, медкомиссийым эртенам да 2011 ий ноябрь годсек «Медведевский» полиций пӧлкаште пашам ыштем. 2013 ий январь гыч участковый улам.
Паша кече индеш шагат эр гыч куд шагат кас марте шуйна. Но участковый-влаклан йӱдымат пашаш лекташ перна. Участкыште иктаж осал сомылым ыштат але моло ситуаций лийын кая гын, йӱдымат, кечывалымат участковыйлан тушко кайыман. Эше пел сутка дене дежуритлена. Тунам дежурный частьыш пурышо кажне вызов – дежурный участковый ӱмбалне, – каласкала Татьяна Павловна.
Т.Иванован административный участкыже – Знаменский ял шотан илем, тыгак Кузнецово ден Руш Кукмарий ял шотан илем-влаклан мутым куча. Индеш ий наре пашам ыштыме жапыштыже верысе калык шке участковыйжым сайын пала.
– Иктаж лу ий ончычсо жап дене таҥастараш гын, кызыт еҥ-влак вашталтыныт манын кертам, осалрак лийыныт. Пошкудо-влак ончычсо семын келшен огыт иле. Южгунам вызовыш мием, сырыше пошкудо-влак сӧрасышт манын шонен, ваш мутланем, а еҥ-влаклан тиде пуйто огешат кӱл. Ты шотышто участковыйлан психологат лияш логалеш.
Южгунам мыланнат калык деч полыш кӱлеш: иктаж-могай преступлений лиймеке, ала иктаж-кӧ иктаж-мом ужын манын йодыштам. А нуно огыт вашеште, капкаштым петырат. Ваш полшен пашам ыштена гын, преступникым вашкенрак муынас. Тидыже лач участковыйлан гына огыл кӱлеш, – манеш Татьяна Павловна.
Вызов-влак утларакшым ешыште вате-марий але пошкудо-влак коклаште вурседылмаш дене кылдалтыныт. «Иктаж-кунам вызовыш лекме годым тыланда лӱдмашан лийын?» манын йодмемлан Т.Иванова тыге вашештен: «Нигунам. Южо колышо еҥын капше деч лӱдеш. А мый тыгай вызовыш икымше гана лекмем шарненат кодын омыл. Ындыже тидлан тунемалтын. Вызовыш мийымеке, обстановкым ончет, айдемын шкенжым кузе кучымыжым шекланет. Службыштына йӱд дежурстват лиеда. Палымем-влак мый дечем чӱчкыдын йодыт: «Йӱдымат шкетын кудалышташ от лӱд мо?» Лӱдмаш нерген ик ганат шонымаш уке. Отделыш вызов пурен, еҥ-влаклан полшыман, мый тидым ыштем».
Нойымаш деч утлаш, вуйым кандараш Татьяна Павловналан спорт полша. Телым тудо ече дене коштеш. Кеҥежым яндар южышто жапым эртара, пакчаштыже тырша. Шукерте огыл Т.Иванова отпуск гыч лектын. Каныш жапыште Киров ден Тюмень областьлаште лийын, родыжо, йолташыже-влак дене вашлийын.
Татьяна Павловналан «Калык участковый-2022» конкурсышто сеҥымашым тыланена. Тидлан меат полшен кертына, https://www.kp.ru/media/903126/?participant=6359452d15c18d00087eab12 ссылке почеш эртен, айста шке йӱкнам Татьяна Иванова верч пуэна.