27-30 мартыште «Михаил Мурашко йолташыже-влакым ӱжеш» черетан фестиваль-конкурс тӱрлӧ кундемла гыч уста куштызо, хореограф-постановщик-шамычым чумырен. Тений тудо Сеҥымашын XXX идалыкше лӱмеш тӱвыра полытыште латкумшо гана эртаралтын.
Фестиваль годым 52 коллектив (1200 участник) 198 конкурс куштымашым ончыктен. Участник-влак Шупашкар, Озаҥ, Моско, Санкт-Петербург, Владимир, Пенза, Тюмень, Челябинск, Барнаул, Бирск олала гыч лийыныт. Нуно народно-сценический, руш да марий сценический, фольклорный, народно-стилизованный, йоча сюжетный, классический, современный, эстрадный куштымаш-влак да посна хореограф-постановщик-шамыч номинацийлаште таҥасеныт.
Фестивальым «Марий Эл» кугыжаныш куштышо ансамбль чапле концертше дене почо. 28 мартыште Чуваш кугыжаныш академический мурышо да куштышо ансамбль куандарен. 29 мартыште Челябинск ола гыч «Ералаш» калык усталык коллектив концертше дене шукыштын кумылыштым савырен.
Кум кече жюри уста коллектив-влакын выступленийыштым аклен. Тылеч посна участник-влаклан ныл мастер-класс, Йошкар-Ола дене палыме лияш экскурсий эртаралтын, «йыргешке ӱстел» годым конкурсын иктешлымашыжым каҥашеныт.
30 мартыште сеҥыше-влакын лӱмыштым гала-концертыште рашемденыт. Гран-прим сеҥен налыныт:
- 5-9 ияш-влак коклаште: «Топотушки» калык куштымаш образцовый ансамбль (Кужэҥер посёлко)
- 14-17 ияш-влак: «Ералаш» калык усталык коллектив (Челябинск ола), «Росинка» калык куштымаш коллектив (Владимир ола).
- 18 ияш да кугурак-влак: «Боярышня» калык куштымаш ансамбль (Моско область Истра ола), Т.Дмитриева лӱмеш «Эрвел марий» мурымо да куштышо калык ансамбль (Йошкар-Ола).
Черевички але портышкем?
Ик ӱдыр портышкемым чиен коштын, йӧратыме качыже тудлан йошкар черевичкым пӧлеклен. Ӱдыр куанымыж дене тынар куштен, таганжым пудыртен. Сандене угыч портышкемым чияшыже логалын. Рвезе мом ышташ, пален огыл. Тыгайрак сюжетым «Валенки» куштымаш гоч Моско оласе «ИСКусство» хореографический ансамбльын кок самырык участникше ончыктен. Карина Степанчук ден Михаил Рудных А.Н.Косыгин лӱмеш славян тӱвыра институтышто кокымшо курсышто тунемыт.
– Мемнан университетыште «Искусство хореографа» кафедре пелен студент-шамычлан «ИСКусство» ансамбльым чумыреныт. Тудым Александр Владимирович Ковтун, Мария Сергеевна Кузнецова вуйлатат. Репертуарна моткоч поян, чыла тӱрлӧ куштымашым тунемына. Тӱрлӧ конкурсыш ушнена.
«Михаил Мурашко йолташыже-влакым ӱжеш» фестиваль-конкурсыш икымше гана толынна. Ме кок куштымашым ончыктенна. Тыгак «Хореографический произведенийыште сюжет», «Дробные постукивания» мастер-классыш миенна.
Яра жапыште Марий кундемын мотор оралтыже-влакым онченна, марий калык кочкышым тамленна. Кастене Йошкар-Олан уремже тӱрлӧ муро семлан поян манын шекланенна да куштенат шуктенна.
Конкурсын иктешлымыж почеш «Народный сценический танец» номинацийыште 2-шо степенян диплом дене палемдалтынна. Тидыже мыланна – кугу пиал, – ойлат студент-влак.
Тӱвыраштым пагалат
Челябинск ола гыч «Ералаш» калык усталык коллектив чотак ойыртемалтын. Тудо конкурс годым икмыняр куштымашым ончыктен, тыгак сольно выступатлен. Шке мастарлыкыштлан кӧра Гран-прим сеҥен налыныт.
– Чыла гаяк номерна авторский улыт. Нунын гоч ме шочмо кундемнан тӱвыраже, йӱлаже нерген палдарена. Ансамбльым Елена Анатольевна Фарладанская вуйлата, Илья Карапыш – тӱҥ репетиторна.
Ансамбльыш 5 гыч 18 ияш марте 400 утла икшыве коштеш. Мемнам ныл тӱшкалан шелыт: подготовительный, изирак, кыдалаш да кугурак.
Ты конкурс-фестивальыш кугурак ийготан-влак толыныт. Тышке виян ӱдыр-рвезе-влак погыненыт, сандене оҥай таҥасымаш лийын, – палдарат 10-шо классыште тунемше-влак Вероника Исмагилова ден Никита Булатов.
Марий кундемыште тыгай кугу кӱкшытан фестиваль-конкурсын пайдылыкше шижалтешак. Куштымаш гоч самырык ӱдыр-рвезе изинек шочмо кундемыштым йӧраташ да пагалаш тунемыт, кӱлеш годым чапшымат нӧлтат.
Тыгак Михаил Петрович Мурашко нерген марий РУВИКИ-ште лудаш темлена.