манеш СВО-што лийше, контракт почеш служитлыше Алексей Яковлев.
Кызыт тудо Контракт почеш военный службыш ойырен налме пунктышто инструктор.
Морко район Ерӱмбал ялын шочшыжын илышым военный службо дене кылдаш шонымаш эре лийын. Морко посёлкысо 1-ше номеран школым тунем пытарымеке, Алексей Марий радиомеханический техникумын студентше лийын, токарь-фрезеровщик специальностьлан тунемаш тӱҥалын. Но икмыняр жап гыч академический отпускым налын, армийыш каен.
– Срочный службым эртыме годымак контрактым подписатлыме нерген шонкаленам. Но ешем дене кутырымеке, тиде шонымашым илышыш шыҥдарымым икмыняр идалыклан ӧрдыжкӧ шӱкалаш логалын – техникумым тунем пытарыманак манме каҥашыштым шотыш налынам. А дипломым налмеке, Йошкар-Оласе предприятийлаште шке профессием дене икмыняр жап пашам ыштен шуктенам, – манеш А.Яковлев.
2019 ийыште Алексей кужу жап шонен коштмыжым шуктен: контрактым подписатлен да Таджикистаныште кум ий службым эртен.
А ӱмаште мартыште тудым иквереш служитлыше йолташыже-влак дене пырля СВО-ш колтеныт. Тушто пӧръеҥ 70 сутка наре лийын.
– СВО-ш каяш кӱлмӧ нерген пален налмеке, мыйым тургыжланымаш але лӱдмаш авалтен манын ом керт. Тидлан посна ямдылалтынамат манаш ок лий. Вет частьыштына служитлыме жапыште мемнам эре ямдылен шогеныт, учений-влак эртаралтыныт. Идалыклан ик гана кугу учений эртен, норматив-влакым чӱчкыдын сдатленна.
Специальный военный операцийыште лийме годым жап вес семын эрта. Кажне кечын боевой задаче-влакым шуктет, тыгодым иктаж-мо нерген шонкалаш от ярсе. Тушко кайымем нерген ача-авамлан ончыч каласен омыл ыле – нуным тургыжландарымем шуын огыл. Ешыштына акам гына пален. Кок-кум арня гыч нунылан йыҥгыртен каласенам. Кажне ача-ава шке шочшыжлан ойгыра, садлан, чӱчкыдын огыл гынат, йӧн лийме семын нунылан йыҥгыртенам, лыпландаренам, – каласкала Алексей.
Контрактым подписатлымыжлан нерген А.Яковлев ик ганат ӧкынен огыл. Тудын палдарымыж почеш, службо тудым сай могырыш вашталтен, чыла шотыштат виянракым ыштен, шукылан туныктен. Тиде моштымаш да шинчымаш варажым военный операцийыште боевой задачым шуктымаште але кеч-могай нелылык годым шке чапым кӱшнӧ кучаш сайынак полшен.
– Специальный военный операцийыште лийме деч вара илышым вес семын ужаш да аклаш тунемынам манын кертам. Кӧргӧ чоныштем ала-мо вашталтын, «кушкынам».
Кызытсе службем контрактым подписатлаш да СВО-ш каяш шонышо-шамыч дене паша дене кылдалтын. Нунын личный делашт, моло документ дене пашам ыштем, лекше йодышыштым рашемдем. СВО-што порысым шуктышо семын контрактым подписатлаш шонышо-шамычлан теве мом каласынем: тидым ышташ шонет гын, кушко да молан кайыметым раш палышаш улат. Тиде корным ойырен налынат гын, порысетым шот дене шукто, – ойла А.Яковлев.
Кеч-могай ситуацийыште пӧръеҥ шке лӱмжым кӱшнӧ кучышаш, шке чапшым волтышаш огыл. А тыгай куштылго огыл пагытыште – поснак.
А.Яковлевын альбомжо гыч налме фото.