16 августышто Волжск оласе стадионышто герой-дружинник Лев Орловым шарныме лӱмеш куштылго атлетике дене «Шестнадцать мальчишеских лет» таҥасымаш лийын. Тушко Марий Эл, Чуваший, Татарстан республикла гыч 60 наре атлет ушнен.
Участник-влак 6 гыч 69 ияш марте лийыныт. Нуно 800, 1500, 3000 метрым куржмаште вийыштым тергеныт. Тӱҥ стартыште 10000 метрым эрташ кӱлын.
Пӧръеҥ-шамыч коклаште чемпион лӱмым Юлсер кундем гыч Константин Сутулов сулен. Тудо лу меҥгым 34 минутат 46 секундышто куржын эртен. Кокымшо – Шернур кундем гыч Андрей Ахтямов, кумшо – Зеленодольск гыч Тимур Салихов.
Ӱдыр-шамыч коклаште икымше Нубар Гиносян лийын. Кокымшо – Ксения Романова, кумшо – Эльвира Кузьмина.