6 майыште «Курымашлык тулым аралена» Всероссийский акций почеш Россий мучко 80 вере тул чӱкталтын. Акцийын рӱдолаже – Ленинград Герой-ола. Мероприятийым торжественно почмаш лач ты олаште тӱҥалын. Вияш эфир йӧн дене тушко моло регион-влак ушненыт. Марий Элыште тулым Медведево посёлкысо Воин чап мемориал воктене чӱктеныт.
Почётан миссийым Россий Герой, Йошкар-Олаште шочын-кушшо Дамир Шаймардановын аваже Ирина Шаймарданова, специальный военный операцийын участникше, Медведево районын эргыже Павел Попов, Медведево посёлкысо 3-шо номеран кадет корпусын командирже Григорий Таланов шуктеныт.
Палемдыман, Марий кундемыште ынде ныл вере Курымашлык тул йӱла. Тылеч ончыч тудым Йошкар-Олаште, Волжск ден Козьмодемьянск олалаште чӱктеныт. Медведево посёлкыш тулым Моско оласе Александровский садыште Палыдыме салтакын шӱгарже воктеч конденыт. Ты суапле паша Калык фронтын «Огни Памяти» тӱнямбал патриотический акцийын ик ужашыжлан шотлалтеш.
Марий кундемыште, поснак Медведево районышто, илыше-шамычлан тиде кугу событий лийын. Райрӱдыштӧ верланыше Воин чап мемориал воктене ятыр еҥ погынен. Нуным ны йӱштӧ йӱр, ны лӱшкышӧ мардеж лӱдыктен огытыл. Жапын-жапын тале йӱр оптымо деч вара шемалге-сур пыл кокла гыч шыратен лекше кече кумылым нӧлтен. А курымашлык тулым чӱктымаш чонышто кугу кышам коден.
Курымашлык тул воктеке толын, Кугу Ачамланде сарыште, СВО-што ӱмыр лугыч лийше салтак-влакым шарналтен, нунын шуктымо порысыштлан тауштен кажне кумылан еҥ, кертеш. Вет шарнымаш тулышто сеҥымашым лишемдаш полшышо, фашизм ваштареш геройла шогышо да тидлан илышыжым чаманыде пуышо совет салтак-влакын чонышт ончыкталтеш. Тидымак палемден, Марий Элым Вуйлатыше Юрий Зайцев мероприятий годым.
Ме шарнена! Ме огына мондо!
М.Скобелевын фотожо.