4 майыште Российысе школлаште, колледж ден педуниверситетлаште Кугу Отечественный сарыште сеҥымылан 78 ий темме лӱмеш торжественный мероприятий-влак эртаралтыныт.
Эн ончычак йоча-влак Российын кугыжаныш флагшым да Сеҥымаш тистым нӧлталыныт. Варажым тунемше-влаклан патриотизм шӱлышан мероприятий-шамыч лийыныт. Нунын кокла гыч иктыже – Сеҥымаш кече дене кылдалтше «Разговоры о важном» занятий.
Тений Педагогын да наставникын идалыкыштыже Российысе тунемме верлаште «Курымашлык полк» акцийым посна класс дене эртараш палемдыме. Школлашке ветеран ден тылын труженикше, Кугу Отечественный сарысе герой-влакын шочшышт, специальный военный операцийын да боевой действийын участникше-влак толыныт.
Тунемше-влаклан «Парад у дома ветерана», «Песни Победы», «Сад памяти», «Без срока давности» да патриотизм шӱлышан моло проектышкат ушнаш темлалтеш.
Марий Элысе школлаште 4 майыште торжественный линейке ден «Курымашлык полк» акций лийыныт. Йоча-шамыч шке родо-тукымыштын портретышт дене ошкылыныт. Тыгак школысо тоштерлаштат пайрем шӱлышан мероприятий-влак эртаралтыныт.
Лаштыкым Эльвира Терентьева ямдылен.