Ты мемориальный комплексым Кугу Отечественный сарыште сеҥымылан 30 ий темме лӱмеш 1975 ийыште почыныт. Тула областьысе Киреевский районышто (Р140 Тула – Новомосковск да Быковка – Богородицк корнывожышто) верланен.
Кӱкшакаште Курымашлык тул да иза-шольо вич шӱгар (сар годым ты районым аралыше салтак-влакым тушто тойымо) улыт. Курганын кок могырыштыжо шогалтыме стендлаште ты районым тушман деч утарыше салтак-влакын фамилийыштым, дивизийыштым возымо.
Кӱкшака кок могырым кок скульптурым ужаш лиеш: ойгырышо салтак да сукен шинчыше ава, а воктенысе стендлаште сар тӱҥалме да мучашлалтме ийлам ончыктымо.
16 метран кӱкшакаште 6 метран вурс стеле нӧлталтеш. Гранит пырдыжеш ончыкылык тукымлан серышым да Чап книгам тойымо. Книгаште сар годым вуйым пыштыше Киреевский районышто илыше-влакын да Богоридицкым аралыше-шамычын лӱмыштым (6260) возымо. Курганыште тыгак Российысе герой-олала гыч кондымо мландан капсул-шамычым аралат. Тусо документ-влакым 2045 ийыште, Сеҥымашлан 100 ий теммылан, почаш палемдыме.
Мемориалын эскизшым да макетшым художник Н.Петровичев ямдылен, тудлан Тула областьысе исполкомын чоҥымо паша пӧлкан тӱҥ инженерже да архитектор Б.Сергеев, Тульский художественный фондын скульпторжо-влак полшеныт.