Тыге маналтеш Национальный художественный галерейыште ончыкталтше ончер.
Тушко миен, марий калыкын илышыжым, республикнан шӱдӧ ияш историйжым, шуко шкешотан картиным ужмемлан моткоч йывыртенам. Сандене тиде куанем дене лудшына-влак дене пайлалтме шуэш.
«Путь длиною в век» манын лӱмдымӧ ончерлан Марий Эл Республикысе кум тоштер гыч экспозицийым чумырымо. Тиде Т.Евсеев лӱмеш Национальный тоштер, Республикысе изосымыктыш ден А.В.Григорьев лӱмеш художественно-исторический тоштерла гыч.
Марий ӱдырамаш вашлиеш
Ончер дене экскурсовод Виктория Емельянова палдарыш:
– Тиде выставкыште живописьым, декоративно-прикладной сымыктышым, графикым, вургемым, тӱрым ончыктымо. Галерейын кумшо пачашыштыже верланыше залыш пурен шогалмеке, мемнам уста художник Галина Богатырёва-Кононован «Марий Эл» картиныже вашлиеш. Тушто чодыра гыч лекше марий ӱдырамашын образшым ончыктымо. Пуйто тудо мемнам пызлыгичке дене сийлынеже. А пызле – марий калыкын аралтышыже. Сандене поро чуриян ӱдырамаш Марий Элын сымыктыш тӱняшкыже ӱжын пурта.
Каласыман: художникын ты картиным сӱретлыме кумылжо йӱдым шочын, сандене кид йымалныже радына лийын огыл. Сюжетше шочмеке, сӱретче простыньым шкафыш сакалтен да сӧралын чиялтен шынден. Тидым вет тоштерыш от вераҥде. Садлан кугу разрешениян фотом ыштыме да лайтбокс формат дене тудым залыште пижыктыме. Турист-влак ты радыналан куанат, да, эше мом тыште ончыктат манын «ылыжын», умбакыже ошкылыт.
Ешарыман: Галина Богатырёва-Кононова (1913-1998) Самара олаште шочын, но Марий Элыште илен да пашам ыштен. Радынаже-шамыч Россий мучко да йотэллаштат аралалтыт. Такшым тудо скульптор семын шукырак тыршен, живописьшат улыт. «Марий Эл» картиным Йошкар-Олалан 400 ий темме лӱмеш 1984 ийыште ыштен.
Умбакыже — «Кугарня» газетыште (2024 ий 9 февраль).