Морко район Унчо селаште илыше Сидоровмыт еш «Уло еш дене» Российысе проектыш ушнен. Нуно тыгай еш-влак коклаште эртарыме лотерейыште Т.Евсеев лӱмеш тоштерышке каяш билетым модын налыныт.
Татьяна Алексеевна кум ӱдырым шкетынак ончен кушта. Кугуракше, Анастасия, Марий кугыжаныш университетыште марий-англичан пӧлкаште тунемеш. Ольга 7-ше классыште шинчымашым пога. А кок ият пелаш Аня йочасадыште шуаралтеш.
Татьяна Алексеевна Унчо кыдалаш школ директорын воспитатлыме паша шотышто алмаштышыжлан да туныктышо-логопедлан пашам ышта. Тудо тыгерак каласыш:
– Ты проектыш вучыдымын ушненна. Школышкына увертарымаш толын ыле. Туныктышо да ача-ава-влак кокла гыч еҥ-влакым ушнаш йодыныт. Тунам мыят шке ешем дене тидым ышташ келшышым. Чыла заданийым шуктен шогена. Такшым конкурс оҥай. Кажне кечын ятыр пашам шуктена: кочкаш шолтена, уремыш лектына, модына. Ынде проектлан кӧра кажне кечысе пашанан шуко татше фотосӱретыште кодыт. Ондакше ме нуным сниматлаш шоненжат огынал.
Ава ден йоча-шамыч конкурслан кӧрак Унчо селаште улшо тӱрлымӧ цехыш, тоштерыш ешге миен коштыныт. Курыкышко гын мунчалташ эре лектеденыт, но ты гана чыланат иканаште миеныт, а посна-посна огыл. Кызыт чыла сомылжымат пырля ыштымыштлан путырак йывыртат.
Теве ик заданийже Ӱярня арняште мелнам кӱэштман ыле. Ты марий ешын ӱстембалныже шочмо кече але 8 март да тыглай кечылаштат мелна пушлана. «Ик пайремат мемнан мелна кышыл деч посна огеш эрте. Шукыж годым ме коҥгаште кӱэштына, кочмо шуын колтымо годым газплиташте вичкыж ден изи мелнам писын гына ыштена, – манеш ава.
Ольгалан курыкышто мунчалтымышт, ече дене коштмышт эн оҥайын чучын. Ава ӱдыржӧ-влакым тӱрымат тӱрлаш туныктен. Тидым вет ожно чыла марий ӱдыр ыштен моштен.
Ты ешыште Т.А.Сидорован ачаже Алексей Кугергинович Фёдоров кугу полышым пуэн шога. Тудо «Передовик» ял озанлыкыште 45 ий наре шофёрлан пашам ыштен. Марий Эл ялозанлыкын сулло пашаеҥже.
– Кочана 72 ийыш тошкалын гынат, пӧртыштӧ ок шинче. Телым эре лумым эрыкта, сурткӧргысӧ сомылкам ыштылеш, а шошо гыч шыже марте шкенжын грузовой машинаж дене ял калыклан полышкала. Нунын йодмышт почеш иктылан шудым конден пуа, весылан ошмам, пум, оҥам да тулеч молымат шупшыкта. Адак легковой машинаж денат тыш-туш намиен кондаш йодыт. Тыгайрак мемнан кочана, ик верыште шинченат ок керт, сомылым шкаланже муынак шога. Мемнамат тӱрлӧ пашалан туныкта, – каласыш кугурак Настя уныкаже.
Эльвира Терентьева.
Авторын да еш альбом гыч налме фото.