6 февральыште Марий Элым Вуйлатыше Ю.Зайцев Курыкмарий районыш миен коштын.
Ялозанлык
Пайскырык селаште Ю.Зайцев пареҥгым да моло пакчасаскам ончен куштышо фермер озанлыкыште лийын. Ты озанлыклан тӱрлӧ технике ден оборудованийым налаш кугыжаныш полышым ойыреныт.
Вара Ю.Зайцев Курыкмарий районысо фермер-влак сообществын еҥышт дене вашлийын, агропромышленный комплекслан полшымо нерген мутланеныт. Ӱмаште, мутлан, ялозанлык сатум ыштен лукшо 61 производительлан техникым налаш 130 млн наре теҥгеаш субсидийым ойырымо, тений 129 млн теҥгем ойырышаш улыт. 2022 ий гыч ялозанлык пашаеҥ-влаклан кугыжаныш полыш 100 тӱжем теҥге гыч 450 тӱжем теҥге марте кушкын. 2022-2023 ийлаште 80 утла еҥ тыгай полышым налын. Ялозанлык аланыште пашаеҥ-влакым шукемдаш тений республикысе бюджет гыч 20,8 млн теҥгем ойыраш палемдыме.
Промышленность
Марий Элым Вуйлатыше Козьмодемьянск оласе «Потенциал» ООО-н сборочный производство цехын пашажым ончалын. Ты заводышто Российысе электроустановочный изделийын 35 процентшым ыштен луктыт.
Ю.Зайцев тыгак «Копир» заводышто лийын. Завод авиационный, ракетно-космический, мландысе да теҥызысе техникылан электрический соединительым ыштен лукмаште Российыште ик эн ончыл верыште. Ю.Зайцевын палемден: Марий Элым социально-экономически вияҥдыме индивидуальный программе почеш промышленностьым вияҥдыме фонд индеш деч шагал огыл инвестиционный проектым илышыш пурташ полшышаш.
Геройлан – Почёт оҥам
Козьмодемьянск оласе лицейын пырдыжешыже ты лицейын выпускникше Л.Рыжовлан Почёт оҥам вераҥденыт. Мероприятийыште Ю.Зайцеват лийын.
Л.Рыжов СВО тӱҥалме икымше кече гычак элнам арала. Тудын вуйлатымыж почеш Российысе военный-влак Донбасс кундемын ужашыжым утареныт. Тидлан кӧра Россий армий Лисичанск ола дек лишемын сеҥен. Лӱддымылык ден патырлыкым ончыктымыжлан Л.Рыжовым «Шӧртньӧ шӱдыр» медаль дене палемденыт.
Виловат селаште Ю.Зайцев физкультур да тазалыкым пеҥгыдемдыме комплексыште лийын. Окса укелан кӧра тудым чоҥен пытарыме огыл, объект 36%-лан ямде.
Сумки селаште корным чоҥымым ончалын. У автокорно 4,7 меҥге кужытан лиеш. Тудым 2024 ий мучаш марте чоҥен шуктышаш улыт.
Миен коштмым иктешлен, Ю.Зайцев совещанийым эртарен. Тушто ЖКХ, туныктымо объект-влакым олмыктымо, промышленность ден туризмым вияҥдыме йодыш-влакым рашемденыт.
Фотом Марий Элым Вуйлатышын пресс-службыжо пуэн.