Российын флагше кече вашеш Марий Элысе молодёжный политике комитет ден Морко район администраций самырык ӱдыр-рвезе-влаклан йолын коштмо маршрутым ямдыленыт. Тудым Росмолодёжьын «Больше, чем путешествие» проектшылан келыштареныт.
Тыге участник-влаклан ныл меҥгым йолын эрташ кӱлын. Нуно Марий Элын эн кӱкшӧ верышкыже, Чукша курыкыш, кÿзеныт. Тушечын Морко кундемын чодыра ден пасулаже кидкопаште улмыла чучыт. Курык вуйышто самырык еҥ-влак 20 метр кутышан да 13 метр лопкытан элнан флагшым шарен ончыктеныт. Тыгак участник-влаклан краеведений сынан экскурсийым, пайремлан келыштаралтше викториным эртареныт. Ты мероприятийыш 50 наре ӱдыр-рвезе ушнен.
Интернет гыч налме фото.