15 октябрьыште Волжский районысо Ӱлыл Азъялыште курыкышто куржталмаш лийын. Тудо Казанский Гурий лӱмеш Пӧтъял черкысе протоиерей-влак Владимир Аллиным да Владимир Захаровым шарныме лӱмеш эртаралтын.
Таҥасымашке Российын ныл регионжо гыч тӱрлӧ ийготан 189 еҥ ушнен. Куржталаш йӧратыше-влак икте гыч куд менге марте тӱрлӧ кужытышто шкеныштым тергеныт. Чыла участникым сертификат дене палемденыт. Чемпион ден призёр-влаклан кубокым, медальым, чапкагазым кучыктеныт.