Курыкӱмбалын ончыкылык врачше

Евгений Бирюковын тукымыштыжо врач-влак улыт: изаже – врач-невролог, чӱчӱжӧ-влак – хирург да стоматолог. Сандене рвезе ты корным ойырен налын, шонымашышкыже шуаш тырша.
Евгений Советский район Курыкӱмбал ялеш шочын-кушкын. 2019 ийыште Ӱшнур кыдалаш школым шӧртньӧ медаль дене тунем пытарен. Ятыр предмет ден олимпиадылаште шке уш-акылжым терген. Марий йылме дене республикысе олимпиадыште ончыл верыш лектын.

Кугурак класслаште биологийым да химийым поснак йӧратен тунемын. Школ деч вара Женя жапым пайдалын эртарен, мероприятийлаште участвоватлен.
Авам Ираида Ивановна Советский районысо рӱдӧ йоча книгагудым вуйлата. Тудлан тӱрлӧ мероприятий-влакым эртараш логалын, сандене мыят кертмем семын полшенам. Книга арня, библиотекын юбилей-пайремже годым вӱдышӧ лийынам. Тыгак районысо тӱвыра пӧрт пеленысе драмтеатрыш коштынам. Тушто «Ял покшелне, клуб воктене» спектакльым шынденна. Мый Пӧчанын образшым почын пуэнам, – ойла Женя.
Кызыт рвезе Чебоксар олаште Чуваш кугыжаныш университетыште лечебный факультетыште кокымшо курсышто шинчымашым пога. Тунем лекмеке, терапевт лиеш.
– Мыланем тыште тунемаш келша, нелылыкат уло. Но чыла тидым чытен лекташ лиеш. Практикым республиканский йоча клинический больницыште, тыгак Чебоксарыште хирургий отделенийыште эртенам, изирак медперсоналын полышкалышыже лийынам. Операцийышкат налыныт. Университетыште ме чыланат куд ий шинчымашым погена, умбакыже аҥысыр специальностьым налше-влак ешартыш кок ийым ординатурышто тунемшаш улыт. Мыят тушко каяш шонем,– каласыш студент.
Занятий-влак деч вара самырык рвезе спортлан жапым ойыра: тренажёр залыш коштеш, куржталыштеш. Тыгак ече дене таҥасымашлаште вийжым терга.
«Шочмо кундемыш чӱчкыдын коштат?» – йодым Евгений деч.
Кажне еҥлан шочмо-кушмо верым коден каяш пеш неле. Мыйынат вес олаш илаш куснымеке, мӧҥгӧ толмо шуын, ача-авам деке чонем шупшын, садлан кок арня гыч шочмо ялыш кудалыштынам. Кызыт йӧн лийме семын коштам.
Тыште шуко еҥ дене палыме лийынам. Нунын коклаште руш, чуваш, татар, таджик-влак улыт. Ме ваш келшен, икте-весым умылен, полшен илена.
Ӱшанле йолташ-влак дене чыла неле-йӧсым чытен лекташ лиеш, – мане Е.Бирюков.
Фотом рвезын альбомжо гыч налме.