Калык фронтын Молодёжка командыже Курск областьысе гуманитарный миссийым шуктымо черетан сменыжым иктешлен.
Кок арня жапыште Марий Эл, Башкирий да Смоленщина гыч 33 доброволец регионысо эвакуироватлыме еҥ-влаклан да СВО участник-шамычлан полшеныт. Волонтёр-влак куд направлений дене пашам ыштеныт.
– Марий Эл гыч команде тылеч ончычат гуманитарный полышым пуымаште тыршен. Ростов-на-Дону да Мариуполь олалаште, Курскышто тыршыме годым кугу опытым погымо да ятыр еҥ дене палыме лийме. Вес регионышто илыше ӱдыр-рвезе-шамыч дене кылна пеҥгыде. Молгунамсе семынак пашам ыштена, еҥ-влаклан полшена. Кызыт тиде поснак кӱлешан, – манеш Марий Элысе Калык фронтын самырык-влаклан «шулдыржын» координаторжо А.Вылегжанина.
Доброволец-шамыч смене дене сутка мучко Курскысо гуманитарный складлаште пашам ыштеныт. Кок арня жапыште нуно эвакуироватлыме еҥ-влаклан 7,6 тӱжем наре кочкыш сату ден гигиене наборым погеныт. 9,4 тӱжем наре вургемым сортироватленыт, 2,5 тӱжем наре мужыр джинс йолашым Курск областьысе районлаш жаплан вераҥдыме ныл пунктыш колтеныт.
Гуманитарный полышым пуышо-влак СВО-што улшо салтак-шамычлан кугун полшеныт. «Чылажат – сеҥымаш верч!» маналтше военный складыште нуно 1500 наре РЭБ системым, тӱрлӧ типан 3872 БПЛА-м, 13 мотоциклым, 400 «Тень» детекторым да 1500 единице моло полышым чумырен колтеныт.
Курскысо военный госпитальыште волонтёр-влак кок смене дене пашам ыштеныт. Ӱдыр-рвезе-шамыч кондымо гуманитарный грузым ястареныт, сусыргышо салтак-влаклан палатым ямдыленыт, медпашаеҥ-шамычлан полшеныт.
Тидын годымак доброволец-влак илалше да маломобильный -шамычлан пансионатыште тыршеныт. Шоҥгыеҥ-влакым яндар южыш луктын коштыктеныт, культурканыш мероприятийлам ямдыленыт, сӱретлыме, мурымо, лудмо занятийлам эртареныт.
Калык Фронтын самырык-влаклан «шулдыр» йымалныже улшо кажне участник «Архангел» тактический подготовко рӱдерыште тактический медицине курсым эртен да икымше полышым пуаш тунемын. Гуманитарный миссийым мучашлыме годым волонтёр-влак «Курская дуга» экскурсийын корныж дене эртеныт. Нуно «Курская битва», «Поклонная высота 269», «Тепловские высоты» комплекслаште лийыныт.
Калык фронтын архивше гыч налме фото.